Косовската претседателка ќе ги информира лидерите на ЕУ дека Косово ќе поднесе барање за членство до крајот на годинава

ТИРАНА (АА) - Претседателката на Косово, Вјоса Османи, рече дека ќе ги информира лидерите на Европската Унија (ЕУ) дека нејзината земја ќе поднесе барање за членство во ЕУ до крајот на годинава, јавува Агенција Анадолија (АА).

Османи одговараше на прашањата на медиумите пред Самитот ЕУ - Западен Балкан што се одржува во Тирана, главниот град на Албанија.

Таа изрази задоволство за учеството на самитот во Тирана, и го оцени самитот како многу важна заложба и од ЕУ и од Западен Балкан.

Османи се опиша себеси како лидер на најпроевропската земја што постои, и додаде:

„Ние ја покажавме нашата посветеност на ЕУ и вредностите на ЕУ во секоја акција што ја преземаме во оваа насока. Особено кога станува збор за 100-процентна хармонизација со ЕУ во секоја надворешнополитичка и безбедносна одлука, како и санкции кон Русија, адаптација, отфрлање на какво било лошо влијание на факторите како Русија и Кина.“

Според неа, ЕУ треба да премине „од зборови на дело“ за либерализација на визите за граѓаните на Косово.

„Како што знаете, денеска пред сите лидери на ЕУ ќе соопштам дека Косово ќе поднесе барање за членство во ЕУ до крајот на оваа година и секако се надеваме на целосна поддршка од членките на ЕУ“, рече Османи.

На прашањето дали ќе се сретне со претседателот на Србија, Александар Вучиќ, и дали има напредок во дијалогот меѓу Србија и Косово, Османи рече дека овој самит не е место за дијалог или преговори меѓу Косово и Србија и дека ова е посебен процес, со посредство на ЕУ.

„Тоа е процес што се заснова на заемно признавање и во исто време сметаме дека Косово мора да го зачува својот територијален интегритет, суверенитет, унитарен карактер и уставен систем“, рече таа.

Потсетувајќи дека Албанија и Северна Македонија ги започнаа преговорите со ЕУ, Османи рече дека денеска ќе ги повикаат лидерите на ЕУ да гласаат за либерализација на визите за граѓаните на Косово.

Косовската претседателка рече дека ќе биде чекор напред доколку на Западен Балкан му се даде јасен сигнал за важноста да се држат до вредностите на ЕУ, додавајќи дека земјите кои се на страната на Украина и оние кои се на страната на Русија не треба да се третираат на ист начин.

Запрашана за изразот „терористички џган“ со кој Вучиќ го опиша косовскиот премиер Албин Курти, Османи посочи дека Вучиќ е продолжување на менталитетот што постоел во Србија во 1990-тите.

„Овој менталитет предизвика војна, уништување и убивање на 150.000 цивили. Овој менталитет мора сите да го отфрлат“, изјави косовската претседателка Вјоса Османи.