Stipe Majic
07 Јуни 2022•Ажурирај: 08 Јуни 2022
ЗАГРЕБ (АА) - Активистите на Гринпис од Хрватска, Унгарија, Полска и Ирска се искачија на гасната платформа „Ивана Б“ на северот од Јадранското Море, на околу 50 километри од хрватскиот брег, и истакнаа голем транспарент со ликот на Урсула фон дер Лајен, со кој се повикува претседателката на Европската комисија да планира постепено укинување на фосилниот гас до 2035 година и да ја поттикне енергетската транзиција кон обновлива енергија во Европската Унија, јавува Агенција Анадолија (АА).
„Фосилниот гас е една од најголемите причини за климатската криза. Токму како и другите фосилни горива, предизвикува војни и им штети на луѓето низ светот. Индустријата за фосилни горива расте и го зголемува својот профит, додека граѓаните мораат да се носат со вртоглавите цени на енергентите. Европските лидери дозволија да се случи таква криза. Наместо да се свртиме кон конкретни и достапни решенија, како што се обновливите извори на енергија и енергетската ефикасност, тие нè држат зависни од фосилните горива“, изјави Естер Матијас, раководител на регионалната кампања против гас во Гринпис ЦИЕ.
Европските политичари сè уште веруваат во зелените лаги на индустријата за фосилни горива, која ја нарекува „преодно гориво“ на патот кон чиста енергија, предупреди Гринпис во соопштението.
„Климатската наука вели кристално јасно е дека фосилниот гас не е решение за климатската криза, туку огромен дел од проблемот! Мораме да го отстраниме што е можно поскоро, а најдоцна до 2035 година за да избегнеме климатска катастрофа. Европа не смее да си дозволи никакви нови гасни платформи, нови гасоводи ниту гасни електрани. Фосилниот гас е проблем без разлика дали доаѓа од Русија, Норвешка, Алжир, Катар или Хрватска“, продолжува Естер Матијас.
„Многу граѓани на ЕУ се борат да ги платат сметките за енергентите да ги загреат домовите. Се проценува дека во 2019 година, околу 50 милиони домаќинства во Европската Унија живееле во енергетска сиромаштија и имале несоодветни основни енергетски услуги. Помеѓу декември 2020 и декември 2021 година, малопродажната цена на енергентите во еврозоната за електрична енергија, гас и други горива се зголеми за 25 отсто“, се наведува во соопштението.
„Од почетокот на војната во Украина, енергетската криза во ЕУ дополнително се влоши“, посочува Гринпис, додавајќи дека сегашниот предлог на Европската комисија, на кој се спротивстави Гринпис, го класифицира фосилниот гас како зелен.
„Од 2013 година, ЕУ ја субвенционираше гасната инфраструктура со повеќе од 5 милијарди евра. Прогласувањето на фосилниот гас за зелен ќе овозможи понатамошни вложувања во овој фосилен енергент. Неодамнешната студија на Гринпис во Франција покажа дека руските енергетски компании Газпром, Росатом и Лукоил лобирале да влијаат на вклучувањето на фосилниот гас во таксономијата на ЕУ за одржливи инвестиции и дека Русија ќе има голема корист доколку тоа се случи. Европската Унија треба да воведе ембарго на рускиот гас за да престане со кофинансирање на војната во Украина, но и да го извади фосилниот гас од таксономијата на ЕУ“, се вели во соопштението.
Гринпис истакнува дека чистите решенија како што се соларната и ветерната енергија, топлинските пумпи, изолацијата на зградите и електрификацијата сега се зрели и можат да се користат низ цела Европа за да се намали потрошувачката на фосилни гасови. Во моментов, многу земји од ЕУ заостануваат во однос на користењето на обновливите извори на енергија. На пример, во 2020 година, сончевата енергија сочинуваше помалку од еден процент од потрошувачката на електрична енергија во Хрватска, додека во исто време повеќе од половина од побарувачката на енергија беше задоволена со увоз на фосилни горива, предупредуваат активистите.
„Зарем не е апсурдно во земја како Хрватска, која според сончевите зраци може да се спореди со Италија и Грција, политичарите да го занемарат потенцијалот за користење на сончевата енергија? Во исто време, фосилните компании како ИНА, а со тоа и МОЛ, продолжуваат да црпат фосилни гасови од Јадранот. Не мора да биде така. Целата потребна енергија можеме да ја добиеме од чисти и безбедни обновливи извори на енергија“, изјави Петра Андриќ од Гринпис во Хрватска.
