Втор круг од локалните избори во Хрватска

ЗАГРЕБ

Од 7 часот отворени се околу 5.500 гласачки места за вториот круг од локалните избори во Хрватска, што се одржува во 432 града и општини и на кои 3,2 милиони гласачи имаат право на глас, јавува Агенција Анадолија (АА).

Гласачките места за вториот круг од локалните избори во Хрватска отворени се во 7 часот наутро, а се затвораат во 19 часот.

Изборите се одржуваат во 432 града и општини на 5.496 гласачки места, а право на глас имаат 3.231.159 гласачи.

Државната изборна комисија ги објавува во 12 часот податоците за излезноста на гласачите до 11:30 часот, а податоците за излезноста на гласачите до 16:30 часот ќе бидат објавени во 17 часот.

ДИК ќе ги објави првите привремени резултати од вториот круг од гласањето на својата интернет-страница на изборниот ден во 20 часот, а податоците понатаму ќе се ажурираат на секои 10 минути.

Изборниот молк завршува во 19 часот, со затворањето на гласачките места.

Вториот круг од изборите се одржува за жупани во 14 жупании, за градоначалник на Град Загреб, градоначалници во 56 градови и за општински началници во 87 општини.

Епидемиолошките мерки за гласачите се маска, сопствено пенкало, дистанца, средство за дезинфекција и што пократко задржување на гласачкото место.

Во Градот Загреб во вториот круг од локалните избори за градоначалник влегуваат Томислав Томашевиќ од Платформата „Можеме“ и Мирослав Шкоро од партијата „Татковинско движење“.

За челното место во Риека се натпреваруваат Мирко Филиповиќ од СДП и независниот кандидат Давор Штимац.

Во Сплит гласачите можат да изберат помеѓу Вице Михановиќ од ХДЗ и Ивица Пуљак од партијата „Центар“, додека во Осиек ќе се бира помеѓу Иван Радиќ од ХДЗ и независниот кандидат Берислав Минаревиќ.