Во Албанија вкупната бројка на починати од коронавирусот се искачи на 9 лица

ТИРАНА (АА) - Во Албанија уште едно лице почина како резултат на новиот вид коронавирус (Ковид-19), со што вкупната бројка на починати во земјата се искачи на 9 лица, пренесува Агенција Анадолија (АА).

Оваа информација преку соопштение ја потврди Министерството за здравство и социјална заштита на Албанија.

Во соопштението се вели дека вечерва во Инфективната болница во Тирана почина 52-годишната пациентка заразена со Ковид-19.

„И покрај напорите на здравствениот персонал, пациентката не успеа да преживее. 52-годишната пациентка е деветтата жртва на Ковид-19 во Албанија“, се вели во ова соопштение.

Инаку, во Албанија се откриени 186 случаи на коронавирус, меѓу кои 9 починати и 31 излекувано лице.