Албанија: Бројот на жртвите во земјотресот се искачи на 51 лице
Во операциите за пребарување и спасување во областа Драч учествуваа тимови од Албанија, Косово, Турција, Северна Македонија, Грција и други земји
ТИРАНА/ДРАЧ (АА) - По завршувањето на операциите за пребарување и спасување во зоните погодени од земјотресот кој се случи на 26 ноември во Албанија, според надлежните институции на оваа земја, бројот на жртвите во земјотресот се искачи на 51 лице, додека стотици лица се повредени, јавува Агенција Анадолија (АА).
Министерството за здравство и социјална заштита на Албанија соопшти дека бројот на жртвите се искачи на 51 лице, откако во болница животот го загуби една 20-годишна девојка.
Премиерот на Албанија, Еди Рама, на вонредна седница на Советот на министри потврди дека завршиле операциите за пребарување и спасување.
Во операциите за пребарување и спасување во областа Драч учествуваа тимови од Албанија, Косово, Турција, Северна Македонија, Грција и од други земји.
Во текот на последните денови Албанија беше погодена од неколку последователни потреси, предизвикувајќи материјална штета и паника кај граѓаните, кои во некои градови привремено ги напуштија своите домови засолнувајќи се кај нивните блиски.
Министерството за здравство и социјална заштита на Албанија соопшти дека илјадници лица добиле медицинска помош, додека 913 лица биле повредени во земјотресот.
Илјадници граѓани кои беа поставени во шаторски кампови, се преместени во хотели и други објекти.
На 26 ноември Албанија беше погодена од земјотрес со јачина од 6,3 степени, кој предизвика смрт кај десетици лица, стотици беа повредени, а беше предизвикана и материјална штета.
