САРАЕВО (АА) - Хрватскиот вицепремиер и министер за одбрана Иван Анушиќ денес рече дека парламентарниот Комитет за одбрана ја одобрил набавката за противдронска заштита, за хаубиците Цезар, тенковите Леопард 2А8 и теренските камиони ТАТРА во вредност од речиси две милијарди евра, пренесува Анадолу.

„Три воени проекти - тенковите Леопард 2А8, хаубиците Цезар и камионите ТАТРА - ќе бидат финансирани со заеми од финансискиот инструмент САФЕ на ЕУ, а системот за противдронска заштита ќе биде финансиран од буџетот на Министерството за одбрана“, објави хрватското Министерство за одбрана.

Министерството продолжува интензивно да ја опремува и модернизира хрватската армија.

Анушиќ наведе дека системот за противдронска заштита ќе чини 125 милиони евра без ДДВ, а станува збор за четири системи - два мобилни и два стационарни.

Тие ќе ја штитат критичната воена инфраструктура, односно два аеродрома, како и цивилниот дел од тие аеродроми.

Во проектите за набавка се вклучени компании и партнери од Хрватска. Меѓу нив се „Кончар“ и „Ѓуро Ѓаковиќ“, а отворена е можноста и за учество на други хрватски производители.

Со тоа се поттикнува развојот на домашната одбранбена индустрија и се зајакнуваат капацитетите на хрватската армија и нејзината интероперабилност со НАТО.

Министерството за одбрана ќе склучи Рамковен договор со компанијата „Кончар“ д.д. за опремување на хрватската армија со систем за заштита од дронови со повеќегодишно финансирање од 2026 до 2029 година. Набавката вредна 125 милиони евра без ДДВ опфаќа два стационарни система за заштита на воената критична инфраструктура и два мобилни система.

Првата фаза, која се планира до средината на 2027 година, предвидува опремување на систем за следење, блокирање и пресретнување на дронови што ќе бидат интегрирани во единствен систем за команда и контрола. Системот ќе биде отпорен на киберзакани и ќе биде поддржан од вештачка интелигенција. Втората фаза од проектот се фокусира на опремување на мобилните системи вооружени со топ со калибар од 30 милиметри поврзан со заеднички систем.

Заедничката набавка на 18 самоодни хаубици Цезар 6 x 6 МК2 се спроведува преку Француската агенција за вооружување (DGA), заедно со Естонија, Бугарија, Португалија и Словенија. Набавката е поделена во два пакета што формираат единствена постапка за набавка.

Основниот пакет се состои од 18 самоодни хаубици Цезар, а дополнителниот пакет од средства за следење и аквизиција на цели, системи за контрола на оган, комуникации и пренос на информации, комуникациски возила, оклопни возила и товарно-теренски возила за транспорт на комплети борбена муниција. Планирано е потпишувањето на договорот за двата пакета да се изврши истовремено, а парите ќе бидат обезбедени од инструментот САФЕ на ЕУ. Рокот за испорака е 2029 година, а вредноста на набавката е приближно 320 милиони евра.

До крајот на годината ќе биде потпишан договор за набавка на 44 најсовремени тенкови Леопард 2A8, а се очекува тенковите да бидат испорачани во Хрватска од 2028 до 2030 година. Во 2028 година, во Хрватска ќе бидат испорачани првите тенкови, а до 2030 година и сите Леопард 2A8. Покрај тенковите, договорот вклучува три симулатори, резервни делови и логистичка поддршка. Парите ќе бидат обезбедени од инструментот САФЕ на ЕУ. Владата на Република Хрватска донесе одлука за подготвителни активности за набавка на нови најсовремени тенкови Леопард 2A8 во ноември 2024 година. Вредноста на набавката е околу 1,3 милијарди евра.

Заедничката набавка на 420 тешки теренски камиони TATRA T-815-7 со погон 6 x 6 и 8 x 8 ќе се спроведе со потпишување Рамковен договор, кој веќе е потпишан од Министерството за одбрана на Чешка, Министерството за одбрана на Словачка и Tatra Defence Systems. Парите ќе бидат обезбедени од инструментот САФЕ на ЕУ, а Рамковниот договор ќе биде потпишан до крајот на годината.

Камионите Татра ги исполнуваат сите стандарди на НАТО за балистичка и заштита од мини, а ги поседува 21 членка на НАТО. Вредноста на набавката е околу 200 милиони евра, а рокот на испорака е од 2026 до 2030 година.