ИСТАНБУЛ (АА) – Холандската управа за заштита на податоци (АП) казни 10 општини со парична казна од вкупно 250.000 евра за кршење на законите за приватност со спроведување истражувања во муслиманските заедници без нивно знаење, објави денес холандската радиодифузна корпорација НОС, пренесува Анадолу.

Фактот дека општините тајно нарачувале истражувања и обработувале датотеки со чувствителни информации за муслиманските жители беше откриен во 2021 година.

Иако општините не биле овластени да чуваат такви информации, некои од податоците наводно биле споделувани и со полицијата, Националниот координатор за борба против тероризмот и безбедноста (NCTV) и Министерството за социјални работи и вработување.

„Општините немале основа да ги поседуваат тие информации. Приватноста на лицата е сериозно нарушена. Ова ја наруши довербата во многу општини“, рече претседателот на АП, Алеид Волфсен.

По совет на Националниот координатор за борба против тероризмот и безбедноста, некои општини ангажирале надворешни агенции за собирање на различни нивоа на чувствителни информации за локалните исламски заедници, вклучувајќи ги и структурите на џамиите и клучните личности, истакна АП.

Парична казна ќе добијат општините Делфт, Еде, Ајндховен, Харлемермер, Хилверсум, Хуизен, Гуаз Мерен, Тилбург, Веендеал и Зоетермер.