ЛОНДОН (АА) – Американскиот претседател Доналд Трамп ќе му предложи на рускиот претседател Владимир Путин можности за профит, вклучително и пристап до украинските минерали, како и олеснување на дел од американските санкции во замена за мир во Украина, објави денес британскиот дневен весник „Телеграф“, пренесува Анадолу.

За претстојниот состанок утре Трамп ќе пристигне на Алјаска, каде што ќе се сретне со Путин, „со голем број можности за остварување заработка“ за да ја охрабри Москва да стави крај на војната во Украина.

Наводно, понудите ќе вклучуваат отворање на природните ресурси на американската држава Алјаска за Русија и укинување на дел од санкциите на САД кон руската авиоиндустрија.

Давањето пристап на Путин до ретките земјени минерали на украинските територии што моментно се под руска контрола, исто така, ќе биде дел од понудата, наведува „Телеграф“.

Весникот наведува и дека се верува оти американскиот секретар за финансии Скот Бесент е меѓу официјалните лица што ќе го информираат Трамп пред средбата со Путин.

Бесент ги истражува економските отстапки што САД може да ги направат за Русија за да го забрзаат договорот за прекин на огнот меѓу Москва и Киев.

Средбата на Алјаска, која ќе се одржи утре, ќе биде прва меѓу актуелни претседатели на САД и Русија од почетокот на војната меѓу Москва и Киев, која трае речиси три и пол години.

Вчера Зеленски изјави дека американскиот претседател Доналд Трамп изразил подготвеност да ѝ осигури на Украина гаранции за безбедност.

Истовремено, Трамп го предупреди рускиот претседател Владимир Путин дека ќе се соочи со „многу сериозни последици“ доколку на претстојната средба не се согласи за прекин на војната во Украина.

Овие изјави ги даде само неколку часа по онлајн состанокот на Трамп со Зеленски и други европски лидери, кој американскиот претседател го оцени како „многу добар“.

Иако европските официјални претставници ја поздравуваат иницијативата на Трамп за воспоставување мир, сепак остануваат претпазливи, стравувајќи дека Вашингтон би можел да изврши притисок врз Киев да прифати територијални отстапки.

Претходно Трамп изјави дека како дел од мировниот договор Русија и Украина би размениле делови од своите територии.