СКОПЈЕ (АА) - Министерот за здравство на Северна Македонија, Азир Алиу, денес се обрати на 11. турски медицински конгрес, кој се одржува во Анкара, на покана на Министерството за здравство на Република Турција, известува Анадолу.

Во своето обраќање министерот Алиу истакна дека Северна Македонија се соочува со исти предизвици како и другите здравствени системи, а тоа е ограничен број специјалисти во клучни области, застарена инфраструктура, дигитални системи што функционираат, но не секогаш меѓусебно поврзано, здравствен кадар под огромен товар, пред сѐ, граѓани што заслужуваат побрз пристап до здравствена заштита.

- Дигитализацијата е почетна точка на реформата

„Дигитализацијата не е избор, тоа е вратата низ која секој здравствен систем мора да помине. Таа не подразбира заменување на лекарите со компјутер, туку ослободување на лекарите од задачи што никогаш и не им припаѓале. Наедно дигиталните алатки му овозможуваат на еден систем со ограничени ресурси да прави скокови за кои порано беа потребни децении“, потенцираше министерот Алиу во своето обраќање.

Тој истакна дека напредните здравствени системи веќе се фокусирани на новини, како што се „дигитални двојници“ што ги симулираат исходите кај пациентите, тријажа поддржана од вештачка интелигенција што открива ризик пред да се појават симптомите, роботска хирургија на далечина и геномска медицина приспособена на секој поединец.

„Овие иновации можеби сè уште не се наша реалност, но тие се сигнали каде што се движи светот и показател на што мора да се подготви секоја држава. Верувам во иднина во која здравството не е реактивно, туку предиктивно, не е бавно, туку интелигентно. Во таа насока се подготвува мојата земја. Тоа е иднината што може да ја изградиме заедно почнувајќи отсега“, заклучи министерот Алиу на 11. турски медицински конгрес во Анкара.