ПРИШТИНА (АА) – Речиси 300 војници од различни земји од светот што служат во рамките на мисијата на НАТО во Косово – КФОР, учествуваа во норвешкиот марш „Рак“ во кампот „Бондстил“ во Косово, јавува Анадолу.

КФОР преку соопштение за медиумите денес изјави дека војниците што учествувале во овој марш доаѓаат од Соединетите Американски Држави (САД), Германија, Данска, Бугарија, Обединетото Кралство, Турција, Швајцарија, Хрватска, Латвија, Словачка и Полска и служат во рамките на Регионалната команда - Исток.

„Маршот беше долг 30 километри со ранци од 11 килограми и се одржа во чест на паднатите војници, одразувајќи ги посветеноста, отпорноста и професионализмот на војниците на КФОР“, се вели во соопштението.

КФОР продолжува да го спроведува својот мандат, врз основа на Резолуцијата 1244 на Советот за безбедност на Обединетите нации од 1999 година, за обезбедување сигурна средина за сите заедници што живеат во Косово и гарантирање на слободата на движење, во секое време и на непристрасен начин.

КФОР е трета безбедносна сила што реагира, по Полицијата на Косово и Мисијата на ЕУ за владеење на правото (ЕУЛЕКС), со кои тесно соработува.