БОГОТА / ИСТАНБУЛ (АА) - Најмалку 42 лица загинаа, а 27 се водат како исчезнати откако поројни дождови предизвикаа силни поплави во неколку региони на Мексико, соопштија денес властите, пренесува Анадолу.

Во соопштението, Националната координација за цивилна заштита на Мексико (CNPC) соопшти дека обилните дождови предизвикале катастрофални поплави во државите Веракруз, Пуебла, Идалго, Керетаро и Сан Луис Потоси.

Според првичните проценки, најмалку 42 лица ги загубиле животите во поплавите, додека тимовите за пребарување и спасување продолжуваат интензивно да работат на пронаоѓање на 27-те исчезнати лица.

Мексиканската претседателка Клаудија Шајнбаум одржа виртуелен состанок со гувернерите на петте најтешко погодени држави со цел координирање на активностите за итна реакција.

„Ниту еден од погодените нема да остане без помош. Тимови и претставници од федералната влада се распоредени за повторно отворање на патиштата и доставување помош до жителите“, рече Шајнбаум по состанокот.

Според мексиканските медиуми, илјадници луѓе се останати без електрична енергија во она што се опишува како една од најтешките катастрофи од поплави во земјата во последните години.

Властите стравуваат дека ситуацијата би можела дополнително да се влоши поради лизгање на земјиштето на планинските падини и прелевањето на реките.

Обилните дождови продолжуваат во многу погодени области, каде што автопатите, улиците и домовите се поплавени.