БЕРЛИН (АА) - Германскиот канцелар Фридрих Мерц денес повторно упати силна критика кон обновената воена офанзива на Израел во Газа, повикувајќи ги властите во Тел Авив да го запрат страдањето на палестинските цивили и да дозволат поголема хуманитарна помош, јавува Анадолу.

„Длабоко сме загрижени поради интензивирањето на воените дејства на израелската армија во Газа и ужаснати сме од страдањата на цивилното население таму“, изјави Мерц на заедничката прес-конференција со финскиот премиер Петер Орпо во градот Турку, Финска.

„Како што реков и вчера, масовните воени напади на израелската армија врз Појасот Газа веќе не ми се јасни од аспект на борбата против тероризмот и ослободувањето на заложниците. Од тој аспект, многу критички гледам на тоа што се случува последниве денови“, рече германскиот канцелар.

Мерц нагласи дека неговата Влада е во постојан контакт со израелските власти, од кои бара да овозможат повеќе хуманитарна помош за палестинското население, вклучително и обезбедување храна и вода.

Конзервативниот лидер повтори дека германската Влада останува посветена на одбраната на безбедноста и правото на постоење на Израел, како што тоа го правеле сите претходни германски влади, но посочи дека критиката на воените акции на Израел не ја исклучува оваа позиција.

„И јас не сум првиот што го кажува ова“, додаде Мерц. „Верувам дека секоја германска влада мора да биде исклучително внимателна кога јавно говори на оваа тема, но мислам дека дојде време да се прозбори за овие настани што сè потешко се разбираат.“

Канцеларот, исто така, побара од палестинската организација Хамас да го положи оружјето и да ги ослободи сите преостанати заложници.

Германија одамна е постојан поддржувач на Израел, при што политичките лидери постојано ја потенцираат историската одговорност на земјата кон Израел што произлегува од нацистичкото минато и злосторствата извршени врз Евреите за време на Втората светска војна.

Како и да е, Владата на Мерц зазеде критичен став кон Владата на Нетанјаху оваа недела како одговор на обновената воена офанзива на Израел во Газа, која одзеде многу цивилни животи, заедно со предложените планови на израелските министри за протерување на Палестинците и анексија на територијата.