Иран му забрани на шефот на нуклеарната агенција на ОН влез во земјата, одби поставување камери на нуклеарните постројки

АНКАРА (АА) - Шефот на иранската дипломатија денес објави дека земјата ќе му забрани на Рафаел Маријано Гроси, генерален директор на Меѓународната агенција за атомска енергија (МААЕ), влез во нивната земја и дека нема да дозволи агенцијата да инсталира камери за надзор во нуклеарните постојки, известува Анадолу.

„Нема да дозволиме Меѓународната агенција за атомска енергија да инсталира камери во нашите нуклеарни централи, а на шефот на агенцијата ќе му биде забрането да влегува во земјата“, изјави Абас Арагчи во изјава објавена од страна на иранската државна новинска агенција ИРНА.

Објавата доаѓа во време на тензии меѓу Техеран и нуклеарното надзорно тело на ОН околу следењето на пристапот и транспарентноста по неодамнешните воени судири со Израел и САД.

Овој потег доаѓа откако иранскиот парламент во среда донесе закон со кој се суспендира соработката со МААЕ.

Дванаесетдневниот конфликт меѓу Израел и Иран избувна на 13 јуни кога Израел започна воздушни напади врз иранските воени, нуклеарни и цивилни објекти, во кои загинаа најмалку 606 лица, а 5.332 беа ранети, според иранското Министерство за здравство.

Техеран возврати со напад со ракети и беспилотни летала врз Израел. Во овие напади загинаа најмалку 29 лица, а повеќе од 3.400 беа ранети, според бројките објавени од Еврејскиот универзитет во Ерусалим.

Конфликтот беше запрен со прекин на огнот со посредство на САД, кој стапи на сила на 24 јуни.