ИСТАНБУЛ (АА) – Кина го претстави својот прв хуманоиден робот дизајниран да функционира во повеќе сценарија, опремен со иновативен систем „еден мозок - повеќе форми“, што овозможува една вештачка интелигенција да управува со повеќе различни форми на роботи, јавуваат локалните медиуми денес, јавува Анадолу

Роботот, наречен Линг Шу, е хуманоиден робот, висок 1,66 метри, тежок 40 килограми, со 33 степени на слобода, што му овозможува движење во сите насоки и приспособување на нерамни или сложени терени.

Роботот е заеднички развиен од компанијата „Јуибот Роботикс“ во Хефеј и Институтот за истражување на хуманоидни интелигентни роботи, во партнерство со Универзитетот „Си’ан Џијаотонг“.

Линг Шу е наменет за извршување различни индустриски задачи, како инспекција на опрема, товарење материјали и логистика.

Џанг Чаохуи, основач на „Јуибот Роботикс“, за „Сајанс енд Технолоџи Дејли“ изјави дека моделот „еден мозок - повеќе форми“ овозможува флексибилно распоредување на роботски форми приспособени на специфични индустриски случаи на употреба.

Тој рече дека роботот ја одразува растечката побарувачка за роботи што извршуваат повеќе задачи низ секторите.

Во магацини за е-трговија, Линг Шу може со едната рака да подигне пакет, а со другата да го скенира. Со звук „бип“ се потврдува внесувањето на податоците во системот.

„Целиот процес интегрира контрола на силата во рацете и 3Д-систем за визуелна перцепција, овозможувајќи непречено сенасочно движење“, рече Чао Ванчу, коосновач на „Јуибот Роботикс“.

Тој додаде дека прецизноста на роботот до ниво од милиметар му овозможува да сортирa пратки, да детектира дефекти, да ракува со полуспроводнички плочи и да врши инспекции во сложени индустриски услови.