СКОПЈЕ (АА) - Амбасадорот на Турција во Скопје, Фатих Улусој, изјави дека Турција е меѓу најголемите трговски партнери на Северна Македонија, јавува Анадолу.

Во Скопје амбасадорот Улусој се сретна на вечера со претставници на деловната заедница што придонесуваат за развојот на билатералните економски и трговски односи меѓу Турција и Северна Македонија.

На настанот, чиј домаќин беше Улусој, присуствуваше и министерот за економија и труд на Северна Македонија, Бесар Дурмиши.

„Турција е меѓу најголемите трговски партнери на Северна Македонија. Нашиот билатерален трговски обем се приближи до една милијарда долари и постои заедничка волја тој да се зголеми на две милијарди долари“, изјави Улусој, нагласувајќи дека ажурирањето на Договорот за слободна трговија, кој датира од порано, е од големо значење за постигнување на оваа цел.

Улусој истакна дека инвестициите од Турција во Северна Македонија достигнаа ниво од две милијарди долари, додавајќи дека Турција континуирано ги продолжува своите економски врски и инвестиции со Северна Македонија во сите области, особено во банкарството, осигурувањето, образованието, здравството, градежништвото, обновливите извори на енергија, земјоделството и сточарството, прехранбената индустрија, текстилот и конфекцијата, трговијата на мало, туризмот, градежното претприемаштво, транспортот, одбранбената индустрија, индустриското производство и културата.

Посочувајќи дека турските компании во Северна Македонија обезбедуваат вработување за 10 илјади лица и играат значајна улога во развојот на земјата, Улусој рече:

„Активностите на нашите бизнисмени не само што ги унапредуваат економските односи туку и ги продлабочуваат врските меѓу народите на двете земји. Нашата молба до почитуваните менаџери на компаниите што соработуваат со Турција е, со цел да се олесни и работењето на турски јазик, да вработуваат млади луѓе дипломирани на катедри како туркологија и турски јазик на универзитетите во земјата. Таквиот чекор истовремено ќе го зголеми интересот и бројот на студенти на овие катедри.“

Улусој потсети дека турската економија во третиот квартал од 2025 година пораснала за 3,7 отсто во споредба со истиот период минатата година, додавајќи дека стапката на раст на бруто-домашниот производ во првите девет месеци од годината, исто така, изнесувала 3,7 отсто.

Истакнувајќи дека Турција бележи континуиран економски раст веќе 21 квартал, Улусој продолжи со зборовите:

„Нашата економија е четврта најбрзо растечка меѓу земјите на ОЕЦД и петта меѓу земјите на Г20. Нашиот годишен бруто-домашен производ во третиот квартал од 2025 година достигна 1,5 трилиони долари и го надмина рекордот поставен во 2024 година. Дополнително, односот на тековниот дефицит кон националниот доход е на одржливо ниво од 1,3 отсто и под историскиот просек. Невработеноста веќе 30 месеци се задржува на едноцифрено ниво. Извозот на Турција кон земјите на Г20 во 2024 година достигна 100 милијарди и 570 милиони долари, а во првите три квартали од 2025 година изнесуваше 75 милијарди и 600 милиони долари.“

Нагласувајќи дека „турската економија ги потврди својата сила и отпорност и покрај глобалната и регионалната негативна конјунктура“, Улусој изрази надеж дека настанот ќе придонесе за натамошно зајакнување на веќе позитивните билатерални економски и трговски односи и ќе создаде нови соработки.

Заблагодарувајќи им се на претставниците на деловната заедница за нивниот придонес во трговските односи меѓу Турција и Северна Македонија, Улусој изјави:

„Ги охрабруваме секоја година сѐ повеќе да ја зголемуваат трговијата со нашата земја, да учествуваат на трговските саеми во нашата земја и да придонесат трговските бројки да се подигнат на уште повисоко ниво.“