ТИРАНА (AA) – Собранието на Албанија со забрзана постапка ја ратификуваше спогодбата за учество на Албанија во „Одборот за мир“, по поканата на претседателот на САД, Доналд Трамп, јавува Анадолу.

Предлог-законот за ратификација на спогодбата за пристапување на Република Албанија, претставувана од премиерот Еди Рама, кон Повелбата на „Одборот за мир“, беше усвоен со 110 гласа „за“, без гласови „против“ и без воздржани, од вкупно 140 пратеници колку што има Собранието на Албанија.

Спогодбата беше принципиелно одобрена на 21 јануари од Советот на министри на Република Албанија.

За време на обраќањето на седницата, премиерот Еди Рама го оцени учеството на Албанија во „Одборот за мир“ како „уште една можност за давање придонес за мирот“.

Пратениците од опозицијата, Демократската партија, се спротивставија на усвојувањето на спогодбата по забрзана постапка, тврдејќи дека се прекршени Деловникот и Уставот, но на крајот гласаа „за“.

Според Собранието на Албанија, законот за ратификација на спогодбата ќе стапи на сила 15 дена по објавувањето во Службен весник на Албанија, а беше соопштено дека претседателот Бајрам Бегај му дал овластување на премиерот Рама за учество во „Одборот за мир“.

- „Учеството во 'Одборот за мир' – развој од особено значење за дипломатијата на земјата“ -

Според албанските власти, учеството на Република Албанија во „Одборот за мир“ претставува развој од особено значење за надворешната политика и дипломатијата на земјата. Исто така, се истакнува дека овој ангажман е директно меѓународно признание за конструктивната, доверлива и одговорна улога што Албанија ја градела со години во областа на мирот, безбедноста и глобалната стабилност.

„Спогодбата има цел создавање на 'Одборот за мир' како меѓународна организација, со меѓународен правен субјективитет, со цел промовирање на стабилноста, воспоставување доверливо и легитимно управување, како и обезбедување одржлив мир во подрачја погодени или загрозени од конфликт“, се наведува во образложението на Советот на министри на Албанија за ова прашање.

Според Владата на Албанија, статусот на основачка членка ѝ дава на Албанија активна и рамноправна улога во обликувањето на визијата, принципите и одлучувачката архитектура на овој меѓународен механизам. „Овој статус значително ги зголемува профилот и видливоста на земјата на глобалната сцена, позиционирајќи ја како фактор на стабилност и актер на мирот во процес што има цел да стави крај на повеќедеценискиот конфликт на Блискиот Исток“, се нагласува, меѓу другото, од Владата на Албанија.

- Поканата од Трамп -

Пред неколку дена премиерот Еди Рама потврди дека Трамп пратил покана за претставување на Албанија во „Одборот за мир“ како основачка членка.

Рама ја оцени оваа покана како „целосно посебен израз на почит и вреднување“ од страна на Трамп.

Претседателот на САД, Трамп, пред неколку дена го најави формирањето на „Одборот за мир“ за Појасот Газа.

Во меѓувреме, Белата куќа ги соопшти и членовите на новиот „технократски“ комитет што ќе го надгледува преносот на власта во Појасот Газа, како дел од планот од 20 точки на Трамп за ставање крај на геноцидната војна на Израел во Газа.