ИСТАНБУЛ (АА) – Италијанската премиерка Џорџа Мелони вчера изјави дека на Италија ѝ е потребно повеќе време за да донесе одлука дали ќе се приклучи кон „Одборот за мир“ за Газа, инициран од американскиот претседател Доналд Трамп, наведувајќи уставни пречки, јавува Анадолу.

Во изјава за државниот сервис „Раи њуз“, Мелони рече дека постои „уставна некомпатибилност“ што не ѝ дозволува на Италија веднаш да го потпише документот за време на официјалната церемонија.

Сепак, таа повтори дека Италија останува „отворена“ за можноста да се приклучи кон Одборот.

„Не е паметен избор, ниту за Италија ниту за Европа, да се исклучиме од тело кое, во секој случај, е интересно“, рече Мелони.

Таа појасни дека постои „прашање на усогласеност“ меѓу статутот на Одборот и член 11 од италијанскиот Устав, „според кој можеме да отстапиме делови од нашиот суверенитет само под услови на еднаквост меѓу државите“, и тоа кон меѓународни организации чија цел е обезбедување мир и правда. Според неа, вакви услови не се исполнети во случајот со „Одборот за мир“.

Запрашана дали „Одборот за мир“ може да прерасне во „приватни Обединети нации“, Мелони нагласи дека „ниедно тело не може да ги замени Обединетите нации“.

„Одборот за мир е создаден во рамките на резолуција на ОН. Постојат и други аспекти кои за нас се проблематични“, додаде таа.

Минатата недела, Белата куќа објави формирање на „Одборот за мир“, паралелно со одобрувањето на Национален комитет за администрација на Газа, едно од четирите тела предвидени да управуваат со преодната фаза во енклавата.

Формирањето на Одборот се совпадна со почетокот на втората фаза од договорот за прекин на огнот, со кој беше запрена израелската војна во Газа, во која од октомври 2023 година загинаа повеќе од 71.000 Палестинци, а над 171.000 се повредени.