КОМОТИНИ (АА) - Полицијата употреби солзавец за да ги растера земјоделците кои се обидоа да го блокираат патот до аеродромот за време на речиси еднонеделните протести на земјоделците во Грција, известува Анадолу.

Според вестите објавени во грчките медиуми, земјоделците кои пристигнале од подрачјето на Солун и Халкидики, движејќи се со трактори кон аеродромот „Македонија“, наишле на полициски бариери.

Безбедносните сили употребија солзавец за да ги спречат земјоделците да го блокираат патот, по што дошло до куса физичка пресметка.

На пристапните патишта до аеродромот настанал застој во сообраќајот, а возилата биле пренасочени кон алтернативни патишта.

Земјоделците што протестираат низ цела Грција, одвреме-навреме ги блокираат меѓуградските автопати и граничните премини. Земјоделците бараат да се извршат плаќања за поддршка, кои се одложени поради обвинувања за корупција во државните стимулации, и бараат спроведување на регулативи што ќе ги намалат високите трошоци за производство.