کەرکووک.. ماوەی سێ رۆژە ئۆتۆمبێلێکی پۆلیس دزراوە

کەرکووک – AA

درەنگانێکی شەوی چوارشەممەی رابردوو، لە گەڕەکی عەدەن باشووری شاری کەرکووک ئۆتۆمبێلێکی تایبەتی بەرێوبەرایەتی پۆلیسی کەرکووک دزرا و تاوەکو ئێستا نەدۆزراوەتەوە.

گوتەبێژی پۆلیسی کەرکووک، عامر نوری لە لێدوانێکی بۆ ئاژانسی ئانادۆڵو گوتی: "درەنگانێکی شەوی چوارشەممە ئۆتۆمبێلێکی پۆلیس لەگەڕەکی عەدەن باشووری شاری کەرکووک دزراوە و تائێستا ئۆتۆمبێلە دزراوەکە نەدۆزراوتەوە".

عامر نوری گوتیشی: "ئەو ئۆتۆمبێلەی پۆلیس کە دزراوە ئۆتۆمبێلی تایبەتە لەجۆری متسیۆبۆشی مۆدێل ٢٠٠٥ تابلۆ بەغدایە و لەپێش ماڵی کارمەندێکی پۆلیس دزراوە و گەڕان بۆ دۆزینەوەیشی بەردەوامە بەڵام تا ئەم ساتە نەدۆزراوەتەوە".

گوتەبێژی پۆلیسی کەرکووک باسی لەوەیشکرد "ئۆتۆمبێلێکی زۆر ھەن کە موڵکی بەرێوبەرایەتی پۆلیسی کەرکووکن بەڵام تایبەتن و بۆ دەوامی فەرمی بەکاری دەھێنین و ئەمەیشی کە دزراوە لەسەر ساڵنامەکەی نووسراوە کە خاوەنداریەتییەکەی بۆ پۆلیس دەگەڕێتەوە، بەڵام رەنگ و شێوازی ئۆتۆمبێلەکە نەگۆڕاوە و بەتایبەت ماوەتەوە".