"١٠٠ هەزار منداڵ لە عێراق رووبەڕووی مەترسی بوونەتەوە"

بەغدا ــ AA

رێكخراوی یونیسێف سەربە نەتەوە یەكگرتووەكان هۆشداری دا كە بە هۆی شەڕو پێكدادانی هێزە عێراقییەكان و چەكداری داعش، ١٠٠ هەزار منداڵ لە شاری مووسڵ رووبەڕووی مەترسی بوونەتەوە.

نوێنەری رێكخراوەكە لە عێراق، پیتەر هۆكوینز لە بەیاننامەیەكدا رایگەیاندووە كە رێكخراوەكەیان راپۆرتی ترسناكی لەبارەی حاڵەتەكانی كوشتنی خەڵكی مەدەنی لە مووسڵ بەدەست گەیشتووە كە لە نێویاندا منداڵ هەیە و لەگەڵ ئەو منداڵانەی كە لە ناوچەكانی شەڕو پێكدادان گیریان خواردووە و چاوڕەوانی هەڵاتن دەكەن.

پیتەر هۆكوینز ئەوەشی گوتووە "هێشتا ١٠٠ هەزار منداڵ لە ناوچەكانی ژێر كۆنتڕۆڵی داعش هەن كە لە دۆخێكی سەخت و دژواردا ژیان دەگوزەرێنن".

ناوبراو داوای لە لایەنە پەیوەندیدارەكان كردووە كە گیانی منداڵان بپارێزن.