ههولێر - AA
بەھۆی راگەیاندنی قەدەغەی ھاتوچۆ کە بەمەبەستی رێگەگرتن لە بڵاوبوونەوەی ڤایرۆسی کۆرۆنا لە هەردوو پارێزگای ھەولێر و سلێمانی راگەیەنراوە، ھاووڵاتییان لە ماڵەکانییاندا دەمێننەوە و، بۆ ئەوەی کە شەکەتی ھاووڵاتییان دەربچێت و نیگەرانییەکانی مەترسی ڤایرۆسی کۆرۆنا برەونێننەوە، کارگێڕی یەکێک لە پڕۆژەکانی نیشتەجێبوون لە شاری ھەولێر لە رێگای میوزیکژەنێکەوە، چەند کاتژمێرێک دەستیان بە ژەنینی میوزیک کرد و خەڵکەکەش دڵخۆشیان دەربڕی.
لە پڕۆژەی کواترۆ لە شاری ھەولێر ئەم چالاکییە بەڕێوەچوو، بەڕێوەبەری پڕۆژەکەش دەڵێت لە بەرنامەماندایە کە رۆژانی نەورۆزیش ئەم جۆرە چالاکییانە بەڕێوەببەین.
بەڕێوەبەری پڕۆژەکە، ھەڵاڵە سوار بۆ ئاژانسی ئانادۆڵو گوتی: "بەھۆی ئەوەی قەدەغەی ھاتوچۆ راگەیاندراوە، بە پێویستمان زانی ئەو چالاکییە بۆ دانیشتووانی پڕۆژەکە ئەنجام بدەین کە ببێتە مایەی دڵخۆشی و ئارامی بۆ دانیشتووان، ھەروەھا لە رۆژانی داھاتووش بەردەوام دەبین و لە پلانماندایە کە رۆژانی نەورۆزیش ئەم چالاکییانە بەردەوام بن''.
ھەروەھا رێکخەری پڕۆژەکە، میران سەفین بۆ ئاژانسی ئانادۆڵو گوتی: ''ئەو خەڵکە چەند رۆژە لە ماڵەوەیە و نەچووەتە دەرەوە بەھۆی قەدەغەی ھاتوچۆوە و، ویستمان تۆزێک کار بکەین بۆ ئەوەی خەڵکەکە دڵخۆش بێت و نیگەرانییەکانیان بڕەوێتەوە، بەخۆشحاڵییەوە خەڵکەکە بە جۆش و خرۆشەوە پێشوازییان لە چالاکییەکەدا کرد''.
لە چالاکییەکەدا، دانیشتووانی پڕۆژەکە، دانسیان لەگەڵ میوزیکەکە دەکرد و بەشێکیان بە چەپڵەلێدانەوە بەشداربوون و ھەندێکیان بە کامێرای مۆبایلەکانییانەوە لە باڵکۆنی تاوهرهكانهوه دیمەنی ناوازەی خەڵکەکە و میوزیکژەنەکەیان تۆمار دەکرد.
