کەشناسی: "رۆژی سێشەممە شەپۆلێکی بارانبارین روو لە هەرێمی کوردستان دەکات"

هەولێر - AA

بەڕێوەبەرایەتی گشتیی کەشناسیی و بومەلەرزەزانی ھەرێمی کوردستان لە راگەیەندراوێکدا ئەوەی خستووەتەڕوو کە رۆژی سێشەممە ھەرێمی کوردستان دەکەوێتە ژێر کاریگەری رەوشێکی ناسەقامگیری کەشوھەوا و ماوەی سێ رۆژ دەخایەنێت.

لە راگەیەندراوەکەی بەڕێوەبەرایەتی گشتیی کەشناسیی و بوومەلەرزەزانیی ھەرێمی کوردستان ئاماژە بەوەکراوە کە لە بەرەبەیانی رۆژی سێشەممە، کاریگەری نزمە پاڵەپەستۆی دەریای ناوەڕاست روو لە ناوچەکە دەکات و بارانبارین بەشێوەی نمە باران لە ناوچە جیاجیاکان دەست پێ دەکات لەگەڵ بارانبارین و بارستە ھەوایەکی سارد.

لە بەشێکی راگەیەندراوەکە ئەوەشخراوەتەڕوو کە ئاستی باران مامناوەند دەبێت، ھەروەھا لەسەر لووتکەی شاخە بەرزەکانیش بەفر دەبارێت و کاریگەری ئەم شەپۆلە لەسەر ناوچەکەمان بەشێوەی نمە باران و بارانی مامناوەند دەبێت بە گشتی، کاریگەری ئەم شەپۆلە رۆژی پێنجشەممە کۆتایی دێت.