Zana Natık Kerem
03 کانوونی دووەم 2022•نوێکردنەوە: 03 کانوونی دووەم 2022
ھەولێر ــ AA
سوپای عێراق خاپوورکردنی دوو حەشارگەی داعش و دەستگیرکردنی ٣٠ داواکراوی لە پارێزگای کەرکووک باکووری ئەو وڵاتە، راگەیاند.
فەرماندەیی ئۆپەراسیۆنەکانی کەرکووک لە راگەیەندراوێکدا ئاماژەی بەوە داوە کە ھێزە ئەمنییەکان، زنجیرەیەک ئۆپەراسیۆنیان لە چەند ناوچەیەکی پارێزگای کەرکووک، ئەنجامداوە.
بەپێی راگەیەندراوەکە لە میانی ئۆپەراسیۆنەکاندا، ٣٠ داواکراو دەستگیرکراون، ھەروەھا دوو حەشارگەی داعشیش خاپوورکراون.
ئەوەیش خراوەتەڕوو کە لە میانی ئۆپەراسیۆنەکاندا، هەروەها دەست بەسەر بڕێک تەقەمەنیدا گیراوە.
وێڕای ئەوەی عێراق لە ساڵی ٢٠١٧دا، سەرکەوتنی بەسەر رێکخراوی تیرۆریستیی داعش و کۆنترۆڵکردنەوەی تەواوی رووبەری ئەو خاکەی کە رێکخراوەکە لە ھاوینی ٢٠١٤دا دەستی بەسەردا گرت راگەیاندووە، بەڵام تا ئێستا رێکخراوەکە لە رێگای پاشماوە و شانە نووستووەکانی ناو بەناو کردەی تیرۆریستی ئەنجام دەدات، بەتایبەتیش لە ژمارەیەک ناوچەی سەربە پارێزگاکانی نەینەوا، کەرکووک، سەڵاحەددین، دیالە و ئەنبار.
