پەیامی پیرۆزبایی مەسعود بارزانی بەبۆنەی جەژنی جەمایێی ئێزدییەکان

هەولێر - AA

سەرۆکی پێشووی ھەرێمی کوردستان، مەسعود بارزانی، بەبۆنەی جەژنی جەمایێ پیرۆزبایی لە میری ئێزدیان و ئەنجوومەنی روحانیی ئایینی ئێزدی و سەرجەم ئێزدییەکان لە ھەرێمی کوردستان و ھەموو جیھان کرد.

مەسعود بارزانی لە پەیامەکەیدا جەختی لە پابەندبوون بە بنەماکانی پێکەوەژیانی ئایینی و نەتەوەیی لە ھەرێمی کوردستان دووپات کردووەتەوە و پشتیوانیی خۆی بۆ داواکاریی و مافی ئێزدییەکان راگەیاندووە.

دەقی پەیامەکەی سەرۆکی پێشووی ھەرێمی کوردستان

بەناوی خودای مەزن و دلۆڤان

بەبۆنەی ھاتنەوەی جەژنی (جەمایێ)ـی ئێزیدی پیرۆزبایی لە میری ئێزدیان و ئەنجوومەنی روحانیی ئایینی ئێزدی و سەرجەم خوشک و برایانی ئێزدیی کوردستان و ھەموو جیھان دەکەم.

ھەر لەو بۆنەیەدا پابەندبوونمان بە بنەماکانی پێکەوەژیانی ئایینی و نەتەوەیی لە کوردستان دووپات دەکەینەوە و جارێکی تر پشتیوانیی خۆشم بۆ داواکاریی و مافی رەوای خوشک و برا ئێزیدییەکان رادەگەیێنم. ھیواداریشم کە خوشک و برا ئێزدییەکانمان ھەموو جەژن و خۆشییەکانیان لە کەشێکی ئارام و پڕ لە ئاسوودەیی بەڕێ بکەن و کۆتایی بەو ئێش و ئازارانە بێت کە لە چەند ساڵی رابردوودا بەھۆی زوڵمی تیرۆریستان بینیویانە.

جەژنتان پیرۆز و بمێنن بە خێر و خۆشی

مسعود بارزانی

٦ـی ١٠ـی ٢٠٢٠