پەیامی سەرەخۆشی مەسعود بارزانی بۆ کۆچی دوایی بابەشێخ

هەولێر - AA

سەرۆکی پێشووی ھەرێمی کوردستان، مەسعود بارزانی بۆ کۆچی دوایی رێبەری رۆحانیی ئایینی ئێزدی شێخ خرتۆ حاجی ئیسماعیل، پەیامێکی سەرەخۆشی بڵاوکردەوە.

بارزانی رایگەیاندووە "بابا شێخ کەسایەتییەکی ئایینی دیار و نیشتیمانپەروەری کوردی ئێزدی بوو کە لە ھەموو بارودۆخێکدا ھۆکاری خێرخوازی و چارەسەرکردن کێشەکان بووە لەناو خوشک و برا ئێزدییەکانمان و بۆ بڵاوکردنەوەی تەبایی و پێکەوەژیان درێخی نەکردووە. لە ھەمانکاتیشدا ھێمایەکی ئایینی و مەعنەوی بووە و بە تایبەتیش لە بارودۆخی ئێستادا لەدەستدانی خەسارەتێکی گەورەیە".

دەقی پەیامەکەی سەرۆکی پێشووی ھەرێمی کوردستان، مەسعود بارزانی

بەداخێکی زۆرەوە ئێوارەی رۆژی پێنجشەممە ١ـی ١٠ـی ٢٠٢٠ کەسایەتیی ئایینی و سەرۆکی رۆحانیی ئایینی ئێزدی شێخ خرتۆ حاجی ئیسماعیل (بابا شێخ) لە شاری ھەولێر کۆچی دوایی کرد.

بابا شێخ کەسایەتییەکی ئایینی دیار و نیشتیمانپەروەری کوردی ئێزدی بوو کە لە ھەموو بارودۆخێکدا ھۆکاری خێرخوازی و چارەسەرکردن کێشەکان بووە لەناو خوشک و برا ئێزیدییەکانمان و بۆ بڵاوکردنەوەی تەبایی و پێکەوەژیان درێخی نەکردووە. لە ھەمانکاتیشدا ھێمایەکی ئایینی و مەعنەوی بووە و بەتایبەتیش لە بارودۆخی ئێستادا لەدەست دانی خەسارەتێکی گەورەیە.

سەرەخۆشی خۆم ئاراستەی میر حازم تەحسین بەگ میری ئێزدیان و ئەنجوومەنی رۆحانیی ئایینیی ئێزدی و پیاوانی ئایینی ئێزدی و خانەوادە و کەسوکاری بابا شێخ و تەواوی خوشک و برایانی ئێزیدی لە کوردستان و ھەموو جیھان دەکەم و خۆم بە ھاوبەشی خەمیان دەزانم. لە خودای گەورە داواکارم رۆحی بابا شێخ بخاتە بەر رەحمەت و دلۆڤانیی خۆی و سەبر و ئارامی بە ھەموو لایەک ببەخشێت.

مەسعود بارزانی

١ـی ١٠ـی ٢٠٢٠