هەرێمی کوردستان هاتوچۆی نێوان پارێزگاكان خۆی و شارەکانی عێراقیشی راگرت

هەولێر ــ AA

وەزارەتی ناوخۆی هەرێمی كوردستان رایگەیاند كە قەدەغەكردنی هاتوچۆی نێوان پارێزگاكانی هەرێم بەهۆی بڵاوبوونەوەی ڤایرۆسی كۆرۆنای نوێ (COVID-19)، تا یەكی مانگی تەمووزی داهاتوو درێژكراوەتەوە و هاوکات سیستەمی رێگەپێدانی ئەلیکترۆنیشی راگرتووە بۆ هاتوچۆی نێوان پارێزگاکانی هەرێمی کوردستان.

لە راگەیەندراوێكی وەزارەتی ناوخۆی هەرێمی كوردستان ـ دا هاتووە: "لە پێناو پاراستنی ئاسایشی تەندروستیی لە هەرێمی كوردستان، بڕیاردرا لە ئەمڕۆ سێشەممەوە تا یەكەمی تەمووز، قەدەغەكردنی هاتوچۆ لە نێوان پارێزگاكانی هەولێر، سلێمانی، دهۆك، هەڵەبجە و ئیدارەكانی راپەڕین و گەرمیان درێژ بكرێتەوە''.

وەزارەتی ناوخۆی هەرێمی کوردستان ئەوەیشی خستووتەڕوو کە سیستەمی رێگەپێدانی ئەلیکترۆنی لەو ماوەیەدا رادەگیرێت جگە لە نەخۆشی شێرپەنجە کە پێویستی بە چارەسەری هەیە و ئەو نەخۆشانەیشی کە پێویستیان بە نەشتەرگەری هەیە و لەکاتی گەڕانەوەشیان پێویستە بەڵگەنامەی چارەسەری یان نەشتەرگەرییان پێبێت و بە پێچەوانەوە رێگایان پێ نادرێت.

هەروەها وەزارەتی ناوخۆی هەرێمی کوردستان تا یەکی تەمووز، هاتوچۆی نێوان پارێزگاکانی عێراق و هەرێمی کوردستانی راگرتووە.

لە راگەیەندراوەكە ئاماژە بەوەیشدراوە كە دەروازە سنوورییەكانی پەروێزخان، باشماخ، ئیبراهیم خەلیل، سەرزێرێ، سەیرانبەند، كێلێ، تەوێلە، پشتە و شووشمێ لەگەڵ فڕۆكەخانكانی نێودەوڵەتی هەولێر و سلێمانی بە داخراوی بە رووی گەشتیاراندا دەمێننەوە.

پێشتر وەزارەتی ناوخۆی هەرێمی كوردستان لە حەوتی ئەم مانگە قەدەغەكردنی هاتوچۆی نێوان پارێزگاكانی هەرێمی تا دوێنێ‌ دووشەممە درێژكردبوویەوە.