نێچیرڤان بارزانی و محه‌مه‌د حه‌لبوسی چه‌ندین ته‌وه‌ر تاوتوێ ده‌كه‌ن

هه‌ولێر - AA
نێچیرڤان بارزانی و محه‌مه‌د حه‌لبوسی هاریكاریكردنی ئاواره‌كان له‌ لایه‌ن عێراق و كۆمه‌ڵگه‌ی نێوده‌وڵه‌تی بۆ گه‌ڕانه‌وه‌یان بۆ ناوچه‌كانی خۆیان به‌ پێویست ده‌زانن.
دوای ئه‌وه‌ی ئێواره‌ی دوێنێ سه‌رۆكی ئه‌نجوومه‌نی نوێنه‌رانی عێراق، محه‌مه‌د حه‌لبوسی گه‌یشته‌ شاری هه‌ولێر له‌گه‌ڵ سه‌رۆكوه‌زیرانی هه‌رێمی كوردستان، نێچیرڤان بارزانی كۆبوویه‌وه‌ و دۆخی سیاسیی عێراق به‌گشتی و دوایین پێشهاته‌كانی پارێزگای مووسڵیان به‌تایبه‌تی تاوتوێ كرد و جه‌ختیان له‌ گرنگی هاوكاری و هه‌ماهه‌نگیی نێوان لایه‌ن و ده‌زگا په‌یوه‌ندیداره‌كانی وڵات بۆ ئاوه‌دانكردنه‌وه‌ی ناوچه‌ زیان به‌ركه‌وتووه‌كانی شه‌ڕی داعش كرده‌وه‌.
له‌ كۆبوونه‌وه‌یه‌كدا كه‌ به‌یانی ئه‌مڕۆ سێشه‌ممه‌ له‌ هه‌ولێر به‌ڕێوه‌چوو و سه‌رۆكی په‌رله‌مانی كوردستان، ڤالا فه‌رید و ژماره‌یه‌ك له‌ به‌رپرسان ئاماده‌ی بوون، هه‌ردوولا دۆخی ئاواره‌كانی عێراقیان له‌ كه‌مپه‌كانی هه‌رێمی كوردستان خسته‌ به‌ر باس و لێكۆڵینه‌وه‌‌ و جه‌ختیان له‌سه‌ر گرنگیی هاوكاریكردنیان له‌ لایه‌ن حكوومه‌تی عێراق و كۆمه‌ڵگه‌ی نێوده‌وڵه‌تییه‌وه‌ كرده‌وه‌ بۆ ئه‌وه‌ی بتوانن بگه‌ڕێنه‌وه‌ شوێنه‌كانی خۆیان و ناوچه‌ زیانبه‌ركه‌وتووه‌كان ئاوه‌دان بكرێنه‌وه‌.

په‌یوه‌ندییه‌كانی هه‌ولێر و به‌غدا، به‌رده‌وامیی گفتوگۆكان بۆ چاره‌سه‌ركردنی كێشه‌كانیان له‌ رێگه‌ی دیالۆگه‌وه،‌ تاوتوێكردنی دۆخی ناوچه‌كه‌ و چه‌ند پرسێكی دیكه‌، به‌شێكی دیكه‌ی كۆبوونه‌وه‌كه‌ بوون.