نێچیرڤان بارزانی ئیدانەی تیرۆرکردنی ھیشام ھاشمی دەکات

هەولێر - AA

سەرۆکی ھەرێمی کوردستان، نێچیرڤان بارزانی لە تویتێکدا سەرکۆنەی تیرۆرکردنی لێکۆڵەر و پسپۆڕی ئەمنیی عێراقی، ھیشام ھاشمی کرد کە ئێوارەی دوێنێ لەبەردەم ماڵەکەی خۆی لە بەغدا تیرۆرکرا.

لە تویتەکەی سەرۆکی ھەرێمی کوردستان، نێچیرڤان بارزانی دا ھاتووە "بەتوندی سەرکۆنەی تیرۆرکردنی لێکۆڵەر و پسپۆڕی ئەمنیی عێراقی، ھیشام ئەلھاشمی دەکەم کە دوێنێ لە ھێرشێکی پلان بۆ داڕێژراودا لە بەغدا تیرۆر کرا".

نێچیرڤان بارزانی پرسە و سەرەخۆشی خۆی ئاراستەی خێزانەکەی کردووە و ئەوەیشی خستووەتەڕوو کە لایەنە پەیوەندیدارەکان دەبێت تیرۆریستان بدۆزنەوە و بیاندەنە دادگا.

ئێوارەی دوێنێ دووشەممە شرۆڤەکاری بواری ئەمنیی، ھیشام ھاشمی لە بەردەم ماڵەکەی لە ناوچەی زەیونە لە شاری بەغدا لەلایەن ژمارەیەک چەکداری نەناسراوە، تیرۆرکرا.