كەلار.. هێرشی چەكدارانی داعش بۆسەر بنكەیەكی هێزەكانی ئاسایش

ـ قایمقامی كەلار، شەهاب ئەحمەد: "لە هێرش و پەلاماری شەوی رابردووی چەكدارانی داعش بۆسەر بنكەیەكی هێزەكانی ئاسایش لە ناحیەی كوڵەجۆ، چوار كارمەندی ئاسایش و پێشمەرگە شەهید بوون و حەوتی تریش بریندار بوون".

سلێمانی ـ AA

هێرشەكەی چەكدارانی رێکخراوی تیرۆریستی داعش لە درەنگانی شەوی رابردوو بۆسەر بنكەیەكی هێزەكانی ئاسایش لە نزیك ناحیەی كوڵەجۆ (30 كلم رۆژئاوای كەلار لە سنووری پارێزگای سلێمانی) بووە و بەو هۆیەوە شەڕوپێكدادان بۆ ماوەیەك لە نێوان هەردوولا روویداوە.

قایمقامی كەلار، شەهاب ئەحمەد لەو بارەیەوە بۆ ئاژانسی ئانادۆڵو گوتی: "چەكدارانی داعش هێرشێكی كتوپڕیان بۆسەر ئەو بنكەیەی ئاسایش بە گولـلە هاوەن ئەنجامداوە و دواتر تەقەیان كردووە و لە ئەنجامدا چوار كارمەندی ئاسایش و پێشمەرگە شەهید بوون و حەوتی تریش بریندار بوون".

ئەو ئاماژەی كرد بەوەی لە لایەن هێزە ئەمنییەكانی ناوچەكەوە رێگری كراوە لەوەی چەكدارانی داعش لە ناحیەكە نزیك ببنەوە و بەو هۆیەوە شەڕوپێكدادان لە نێوان هەردوولا روویداوە.

قایمقامی كەلار باسی لەوەش كرد، چەكدارەكانی رێکخراوی تیرۆریستی داعش لە ناوچەكانی تری جەلەولا و سەعدیە و قەرەتەپە كە ناوچەی گەرمن و چەكدارانی داعش لەو ناوچانە بونیان هەیە هاتبوون، تا ئێستاش زیانەكانی ئەوان لە هێرشەكەدا نازانرێت و هێزەكانی ئاسایش لەو بارەیەوە بەدواداچوون دەكەن.

لەنێو قوربانییەكاندا دوو كارمەندی ئاسایش و دوو پێشمەرگە هەیە كە یەكیان پۆستێكی باڵای هەیە و بەرپرسی ئۆپەراسیۆنەكانی گەرمیان بووە بە ناوی ئاسۆ جەلال.