دھۆک - AA

فەرمانگەی میدیا و زانیاری حکوومەتی هەرێمی کورستان-عێراق بڵاویکردەوە: "لە درێژەی گەشەپێدانی پڕۆژە گەشتیارییەکانی ھەرێمی کوردستان، قۆناغی دووەمی پڕۆژەی کۆڕنیشی زاخۆ بە گوژمەی شەش ملیار دینار تەواو دەبێت".

ئاماژە بەوەش دراوە: "لەم قۆناغەدا درێژیی کۆڕنیشی زاخۆ، سێ کیلۆمەترە و زیاتر لە سەدا ٥٠ی ڕووبەرەکە سەوزایی لەخۆ دەگرێت، هەروەها پیادەی ھاتوچۆ بە درێژایی هەشت مەتر بۆ ھەر لایەک دروست کراوە، پڕۆژەکە سەدا ٨٥ی تەواو کراوە، لە پڕۆژەکەدا خواردنگە، کافتریا و بەلەمی گەشتیاری هەیە، بە تەواوبوونی پڕۆژەکەش ژمارەی گەشتیاران بۆ زاخۆ زیاتر دەبێت".

قۆناغی یەکەمی پڕۆژەی گەشتیاریی کۆڕنیشی زاخۆ بە درێژایی هەزار و ٥٠٠ مەتر لە ھەردوو دیوی ڕووباری خابوور لە زاخۆ جێبەجێ کراوە، کە تێچووەکەی ١١ ملیار و ٥٠٠ ملیۆن دینارە، لە ناو پڕۆژەکەدا بەنداوێک بە درێژایی ٧٣ مەتر و بەرزیی ٣.٥ مەتر دروست کراوە کە توانای گلدانەوەی ٢٥٠ ھەزار مەتر سێجا ئاوی ھەیە، لە ھەمانکاتدا سەدا ٧٠ی ئەو پڕۆژەیە سەوزاییە و ئەمەش سوودێکی باش بە ژینگەی ناوچەکە دەگەیەنێت.