Sarmand Hameed
27 کانوونی دووەم 2022•نوێکردنەوە: 27 کانوونی دووەم 2022
هەولێر-AA
جێگری سەرۆکی حکوومەتی هەرێمی کوردستان، قوباد تاڵەبانی لەگەڵ سەندیكای رۆژنامەنووسانی كوردستان كۆبوویەوە و لە میانی کۆبوونەوەکەدا تاوتوێی پرسی مافی رۆژنامەنووسان كراوە.
قوباد تاڵەبانی لەبارەی ناوەڕۆکی کۆبوونەوەکە، لە پەڕەی تایبەتی خۆی لە تۆڕی کۆمەڵایەتیی فەیسبووک، نووسیوویەتی: "لەگەڵ سەندیكای رۆژنامەنووسانی كوردستان كۆبوومەوە، پێكەوە باسمان لە پرسی؛ مافی رۆژنامەنووسان كرد و بەتایبەت راگرتنی باڵانسی جێندەری لە كەناڵەكانی راگەیاندن و پاراستنی ژنان و كچانی میدیاكار لەھەر ھەڕەشە و توندوتیژییەک كە رووبەڕوویان دەبێتەوە".
جێگری سەرۆکی حکوومەتی هەرێمی کوردستان راشیگەیاندووە: "ھەر لەو چوارچێوەیەشدا، جەختمان كردەوە لەسەر گرنگی كاركردن بە یاسای كاری رۆژنامەگەری و ھەمواركردنەوەی بە جۆرێک كە لەگەڵ ئەم سەردەمەی دیجیتاڵ میدیادا بگونجێت".
قوباد تاڵەبانی هەروەها نووسیوویەتی: "داوام لێكردن كار بكەن بۆ ئەوەی لە داھاتوودا كۆنگرەی سەندیكای رۆژنامەنووسان ببەستن و لەمەشدا ئێمە ھاوكاریان دەبین".
