11 کانوونی یەکەم 2019•نوێکردنەوە: 12 کانوونی یەکەم 2019
بەغدا ــ AA
سەركردەی رەوتی سەدر، موقتەدا سەدر نامەیەكی ئاراستەی ئەنجوومەنی نوێنەرانی عێراق كردووە كە تیایدا ژمارەیەك پێشنیازی سەبارەت بە پرۆژەیاسای هەڵبژاردنەكان كە چاوەڕان دەكرێت ئەمڕۆ چوارشەممە دەنگی لەسەر بدرێت، خستووەتەڕوو.
لەوبارەوە ساڵح محەمەد عێراقی نزیك لە سەركردەی رەوتی سەدر لە هەژماری تایبەتی خۆی لە تۆڕی كۆمەڵایەتی فەیسبووك بڵاوكردووەتەوە كە موقتەدا سەدر ژمارەیەك پێشنیازی تایبەت بە پرۆژەیاسای هەڵبژاردنەكان پێشكەش بە ئەنجوومەنی نوێنەران كردووە کە تیایدا ئەندامانی ئەنجوومەن هاندەدات دەنگ لە بەرژەوەندی یاسایەك بدەن كە سوودی بۆ گەل هەبێت.
لە پێشنیازەكانی موقتەدا سەدر-دا هاتووە "پێویستە خۆكاندیدكردن بۆ بۆ هەڵبژاردنەكان لەهەر پارێزگایەك، تاكە كەسی بێت بەڕێژەی سەد لەسەد لەگەڵ لەبەرچاوگرتنی ژمارەی دەنگدەران".
هەروەها موقتەدا سەدر لەچوارچێوەی پێشنیازەكانیدا داوایكردووە کە دەنگدان لە دەرەوە هەڵبوەشێندرێتەوە ئەگەر بەشێوەی كاتیش بێت یان زۆر بەباشی وردبینی بۆ بكرێت، یان بەپێی توانا دەنگدەران لە دەرەوە بۆ دەنگدان بگەڕێندرێنەوە ناوەوەی وڵات، داوایشی کردووە رێکارەکانی تایبەت بە دەنگدانی لایەنەكانی ئەمنی بە باشی بگیرێنەبەر".
سەبارەت بە ئەنجوومەنی پارێزگاكانی-یش، سەركردەی رەوتی سەدر، موقتەدا سەدر پێشنیازیكردووە لە هەر پارێزگایەك سێ كەس هەڵبژێردرێت كە ئەوانیش پارێزگار و جێگرەكەی لەگەڵ سەرۆكی ئەنجوومەنی پارێزگا، چونكە وەك خۆی ئاماژەی بۆ دەكات ئەوە دەبێتە جێگەی رەزامەندی گەل.
موقتەدا سەدر هۆشداریشیداوە لە ئەگەری دەنگنەدان لەسەر پرۆژەیاسای هەڵبژاردنەكان یان دواخستنی و رایگەیاندووە ئەگەر ئەوە رووبدات ئەو كات گەل قسەی خۆی دەبێت.
دوێنێ سێشەممە، ئەنجوومەنی نوێنەرانی عێراق رایگەیاندبوو كە ئەمڕۆ چوارشەممە، پرۆژەیاسای هەڵبژاردنەكان دەخاتە دەنگدانەوە.
