سەرۆکایەتی کۆماری عێراق بە ئامانجگرتنی بارەگایەکی ئەمنی لە بەغدا سەرکۆنە دەکات

ھەولێر – AA

سەرۆکایەتی کۆماری عێراق ڕایگەیاند کە بە ئامانجگرتنی بارەگایەکی ئەمنی لە بەغدا، پێشێلکردنی ئاسایش و سەروەریی عێراقە و ھۆشداری ئەوەشدا کە بەردەوامبوونی گرژییەکان، دەبێتە مایەی لەناوبردنی دەرفەتی ئاشتی و سەقامگیری لە ناوچەکە.

سەرۆکایەتی کۆماری عێراق راگەیەندراوێکی لەبارەی بۆردومانکردنی بارەگای لۆجستی لیوای ١٢ی بزووتنەوەی نوجەبا سەربە حەشدی شەعبی لە ناوەڕاستی بەغدا بڵاوکردەوە و تیایدا ڕایگەیاندووە: "بە توندی ئەو دەستدرێژییە سەرکۆنە دەکەین کە بارەگایەکی ئەمنی لە بەغدا کردە ئامانج و ژمارەیەک قوربانی لێکەوتەوە".

ئاماژەی بەوەشداوە کە ئەو دەستدرێژییە، پێشیلکردنی ئاسایش و سەروریی عێراقە، ھەروەھا دەستدرێژییەکە، پێشێلکردنێکی ڕوونی پەیوەندییەکانی نێوان عێراق و ھاوپەیمانی نێودەوڵەتیی، ھەروەھا پێچەوانەی ئەرکەکانی ھاوپەیمانی نێودەوڵەتییە کە خۆی لە پێشکەشکردنی یارمەتی و ڕاوێژ بە ھێزە ئەمنییەکانی عێراق دەبینێتەوە.

ئەوەشی خستووەتەڕوو، عێراق ھۆشداری دەدات لەوەی کە بەردەوامبوونی گرژییەکان، دەبێتە مایەی لەناوبردنی دەرفەتی ئاشتی و سەقامگیری لە ناوچەکە، ھەروەھا عێراق داوا دەکات کە لە ڕێگای گفتوگۆوە، گرژییەکانی نێوان سەرجەم لایەنەکان چارەسەر بکرێت.

ئەمڕۆ پێنجشەممە، بارەگای لۆجستنی لیوای ١٢ ی بزووتنەوەی نوجەبا سەربە حەشدی شەعبی لە ناوەڕاستی بەغدا، بۆردومان کرا و بەھۆیەوە فەرماندەی ئۆپەراسیۆنەکانی پشتێنەی بەغدا لە حەشدی شەعبی، موشتاق تاڵب سەعیدی ناسراو بە (ئەبو تەقوا) و لەگەڵ یەکێک لە پاسەوانەکانی کوژران، ھەروەھا پێنج چەکداری دیکەش برینداربوون.