بایدن لەگەڵ سیسی و شێخ تەمیم باسی لە بەدیهێنانی ئاگربەست کرد لە غەززە

واشنتۆن - AA

سەرۆکی ئەمریکا، جۆ بایدن لەو پەیوەندیە تەلەفۆنییانەی لەگەڵ سەرکردەکانی میسر و قەتەر ئەنجامیدا، داوای لێکردن کاریگەرییەکانیان لەسەر حەماس بەکاربهێنن بۆ گەیشتن بە ئاگربەستێک لە غەززە و ئازادکردنی بارمتەکان.

بەپێی ڕاگەیاندراوی کۆشکی سپی، سەرۆکی ئەمریکا بایدن بە جیا پەیوەندی تەلەفۆنی لەگەڵ هەریەک لە سەرکۆماری میسر، عەبدولفەتاح سیسی و میری قەتەر، شێخ تەمیم بن حەمەد ئال سانی ئەنجامداوە.

لە هەردوو پەیوەندیە تەلەفۆنییەکەدا بایدن بە شێوەیەکی گشتگیر تاوتوێی پرۆسەی پەیوەست بە گفتوگۆکانی ئاگربەستی کردووە کە لە ئێستادا لەسەر مێزی گفتوگۆیە و میسر و قەتەر بەشدارن تیایدا و، سوپاسی سیسی و شێخ تەمیم کردووە بۆ هەوڵەکانیان لەو بارەیەوە.