رێبەر ئەحمەد: "سەردانی بەغدا دەکەین بۆ تەواوکردنی رێککەوتنێک لەبارەی شنگال"

ھەولێر - AA

وەزیری ناوخۆی ھەرێمی کوردستان، رێبەر ئەحمەد، ئاشكرایكرد سبەی ھەینی سەردانی شاری بەغدا پایتەختی عێراق دەکەن بۆ تەواوکردنی رێککەوتنێک لەگەڵ حکوومەتی فیدراڵی لەبارەی ئاساییکردنەوەی دۆخەکە و گەڕاندنەوەی سەقامگیریی بۆ شنگال.

وەزیری ناوخۆی ھەرێمی کوردستان، رێبەر ئەحمەد لە ھەژماری تایبەتی خۆی لە تۆڕی کۆمەڵایەتی تویتەر نووسیوویەتی: "بەیانی سەردانی بەغدا دەکەم بەمەبەستی واژووکردنی رێککەوتنێک لەگەڵ حکوومەتی فیدراڵی لەبارەی ئاساییکردنەوەی دۆخەکە و گەڕاندنەوەی سەقامگیریی بۆ شنگال".

دوای گشتپرسی ھەرێمی کوردستان لە ساڵی ٢٠١٧دا، و لووتکەی ناکۆکییەکانی نێوان ھەولێر و بەغدا، شنگال لە پاڵ کۆمەڵێک ناوچەی جێناکۆکی نێوان هه‌رێم و به‌غدا، کەوتە ژێر دەستی چەکدارانی نایاسایی و ھێزەکانی حەشدی شەعبی.

خەڵکی ئاوارەی شنگال، کە دوای ساڵی ٢٠١٤ ناوچەکەیان بە ھۆی ھێرشی داعشەوە چۆڵکردبوو، داوا دەکەن ھێزە چەکدارەکان شارەکەیان چۆڵبكه‌ن و دۆخی مەدەنی و ئاسایی بۆ ناوچەکەیان بگەڕێتەوە.

چاوەڕوان دەکرێت واژووکردنی رێکەوتنی نێوان ھەرێمی کوردستان و بەغدا رێگە بۆ گەڕانەوەی ئەو ئاوارانە خۆش بکات کە بەشێکی زۆریان لە دۆخێکی ناھەمواری کەمپەکاندا دەژین.