دەزگای دژەتیرۆری عێراق کوژرانی ٢٥٧ تیرۆریستی راگەیاند

ھەولێر ــ AA

دەزگای دژەتیرۆری عێراق رایگەیاند کە لە میانی ١٧ مانگدا، ٢٥٧ تیرۆریستیان کوشتووە و ٤٧٢ تیرۆریستی دیکەیشیان دەستگیرکردووە.

لە راگەیەندراوێکدا دەزگای دژەتیرۆری عێراق ئاماژەی بەوەداوە کە ھێزەکانی دژەتیرۆر لە سەرەتای مانگی ئایاری ساڵی رابردووداوە تا ٢٥ی ئەم مانگە، ٤٨٧ ئۆپەراسیۆنیان ئەنجامداوە و ھاتووە "لە میانی ئۆپەراسیۆنەکەدا، ٢٥٧ تیرۆریست کوژراون و ٤٧٢ تیرۆریستی دیکەیش دەستگیرکراون".

هەروەها باس لەوەشکراوە کە لە میانی ئۆپەراسیۆنەکاندا و لە ئاکامی ٦٢٩ ھێرشی ئاسمانییدا، ٣٧٧ حەشارگەی تیرۆریستان خاپوورکراون.

لە راگەیەندراوەکەدا ئەوەیش خراوەتەڕوو کە لە سەرەتای مانگی ئایاری ساڵی رابردووداوە تا ٢٥ی ئەم مانگە، ٢١١ پێشتێنەی بۆمبڕێژکراو و بۆمبی چێنراو، پووچەڵکراونەتەوە و دەست بەسەر ٣٦٥ کیلۆگرام ماددەی تەقەمەنییدا گیراوە.