خۆپیشاندانی وانەبێژانی خۆبەش لە شاری ناسرییە باشووری عێراق

ھەولێر ــ AA

ژمارەیەکی زۆر لە وانەبێژانی خۆبەش لە ناوەڕاستی شاری ناسرییە سەنتەری پارێزگای زیقار باشووری عێراق، خۆپیشاندانیان ئەنجامدا و داوایانکرد بخرێنە سەر میلاکی وەزارەتی پەروەردە.

میدیاکانی عێراق بڵاویانکردەوە کە ژمارەیەکی زۆر لە وانەبێژانی خۆبەش لە بەردەم بەڕێوەبەرایەتی پەروەردەی زیقار، خۆپیشاندانیان ئەنجامداوە و داوایانکردووە بخرێنە سەر میلاکی وەزارەتی پەروەردە.

ئاماژەیان بەوەیشداوە کە وانەبێژانی خۆبەش لە میانی خۆپیشاندانەکەدا رایانگەیاندووە کە لە ئەنجامدانی خۆپیشاندان، بەردەوام دەبن تا ئەو کاتەی داواکارییەکانیان جێبەجێ دەکرێت.

دوێنێ دووشەممە سەرۆکوەزیرانی عێراق، مستەفا کازمی بەڵێنی دابوو کە چارەسەرێکی دادپەروەرانە بۆ کێشەی وانەبێژانی خۆبەش بدۆزێتەوە.