بەغدا.. دەستگیركردنی پێنج کەس بەتۆمەتی تێوەگلان لە رووداوەكەی وەسبە

بەغدا ــ AA

وەزارەتی ناوخۆی عێراق رایگەیاند کە پێنج كەسیان دەستگیرکردووە بەتۆمەتی تێوەگلان لە رووداوەكەی گۆڕەپانی وەسبە ناوەڕاستی بەغدا.

رۆژی پێنجشەممەی رابردوو، گەنجێكی تەمەن ١٧ ساڵ لەدوای پێکهەڵپژان و دەمەقاڵییەک بە كلاشینكۆف تەقەی بەڕووی خۆپیشاندەراندا كرد لە گۆڕەپانی وەسبە ناوەڕاستی بەغدا و لە ئاكامدا، چوار خۆپیشاندەر كوژران و دوای رووداوەكەش، خۆپیشاندەران دوای گەنجەكە كەوتن و چوونە سەرماڵەكەی و ئاگریان لە ماڵەكەی بەردا.

خۆپیشاندەران گەنجەكەیان كوشت و بە ستوونێكدا لە گۆڕەپانی وەسبە هەڵیانواسی و دواتر هێزە ئەمنییەكان گەیشتنە شوێنەكە و تەرمی گەنجە كوژراوەكەیان هێنایە خوارەوە.

لەوبارەوە گوتەبێژی وەزارەتی ناوخۆ، عەمید خالید مەحننا لە لێدوانێكیدا بۆ ئاژانسی هەواڵیی فەرمی عێراق گوتوویەتی "هێزە ئەمنییەكان، پێنج كەسیان دەستگیركردووە كە تێوەگلاون لە رووداوەكەی گۆرەپانی وەسبە".

دوێنێ‌ هەینی نوێنەری مەرجەعی باڵای شیعە لە عێراق، ئەحمەد سافی رووداوەكەی وەسبەی بەتاوانێكی قێزەون ناوزەند كرد و رایگەیاند كە پێویستە ئەنجامدەرانی ئەو تاوانە سزابدرێن.

پێشتر گوتەبێژی سەربازی حكوومەتی كاربەڕێكەری عێراق، لیوا عەبدولكەریم خەلەف ئاشكرایكردبوو، بەپێی ئەو بەڵگانەی كە لە بەردەستدان، ئەنجامدەرانی ئەو تاوانە ناسراون و لەزووترین كاتدا لە لایەن هێزە ئەمنییەكانەوە دەستگیردەكرێن.