ئاگری نەورۆز لەسەر قەڵای ھەولێر کرایەوە

هه‌ولێر - AA

رێوڕەسمی ھەڵکردنی ئاگری نەورۆز لەسەر قەڵای ھەولێر بەبێ ئامادەبوونی ھاووڵاتییان بەڕێوەچوو.

بەهۆی قەدەغەی هاتوچۆ لەلایەن حکوومەتی هەرێمی کوردستانه‌وە کە وەک هەنگاوێک بۆ رێگرییكردن لە بڵابوونەوەی ڤایرۆسی کۆرۆنا راگەیەنراوە، بەبێ ئامادەبوونی ھاووڵاتییان، ئاگری نەورۆز لەسەر قەڵای ھەولێر کرایەوە.

کاتژمێر شەشی ئێوارەی ئەمڕۆ، مەشخەڵی ئاگری نەورۆز لەلایەن پارێزگاری ھەولێر، فرسەت سۆفی و ژمارەیەک بەرپرسانی دیکەی حزبی و حکوومی و بە ئامادەبوونی دەزگاکانی راگەیاندن، لەسەر قەڵای ھەولێر کرایەوە.

چەند خولەکێک دوای کردنەوەی ئاگرەکە، ئامادەبووان شوێنەکەیان جێهێشت، و دواتر لەلایەن تیمەکانی بەرگریی شارستانییەوە ئاگرەکە کوژێنرایەوە.

نەورۆز لە رۆژژمێری کوردیدا بە یەکەم رۆژی ساڵ دادەنرێت و زۆرێک لە نەتەوەکانی رۆژھەڵاتی ناوەڕاست ئەم رۆژە بە رۆژێکی پیرۆز دەزانن.

کورد لە سەرانسەری جیھان رۆژی نەورۆز پیرۆزبایی لەیەکتر دەکەن و لە شوێنە بەرزەکان ئاگر دەکرێتەوە، بەڵام ئەمساڵ بەھۆی راگەیاندنی قەدەغەی ھاتوچۆوه‌، جگە لە كردنه‌وه‌ی ئاگر لەسەر قەڵای ھەولێر، ھیچ رێورەسمێکی دیکە بەڕێوەنەچوو.

نەورۆز بە مانای نەمانی سەرما و سۆڵه‌ و ژیانەوەی سرووشت و بە یەکەم رۆژی بەھار دادەنرێت.