میسی بڕیاری دا هاوسەرگیری بکات

ئەستێرەی یانەی بەرشەلۆنەی ئیسپانی و هەڵبژاردەی ئەرجەنتین بۆ توپی پێ، لیۆنێل میسی دوای بەسەربردنی ماوەیەکی درێژ لەگەڵ خۆشەویستەکەی، ئەنتۆنێلا رۆکوزۆ دواجار بڕیاری دا هاوسەرگیری لەگەڵ بکات.

بە گوێرەی میدیاکانی ئیسپانیا و ئەرجەنتین، لیۆنێل میسی لە هاوینی داهاتوودا هاوسەرگیری لەگەڵ ئەنتۆنێلا رۆکوزۆ دەکات.

بە گوێرەی هەواڵەکان، میسی بڕیاریداوە ئاهەنگی هاوسەرگیرییەکەی لە شاری رۆزاریۆ لە ئەرجەنتین ئەنجام بدات و تیایدا زۆربەی کەسایەتییە بەناوبانگەکانی وەرزشی بانگهێشت بکات.

میسی لە تەمەنێکی بچووکدا پەیوەندی خۆشەویستی لەگەڵ رۆکوزۆی ئامۆزای لوکاس سکاگیلادا هەبوو کە ناوبراو دۆستێکی نزیکی میسی-یە و بۆ ماوەیەکی درێژ پەیوەندییەکەیان بە نهێنی مایەوە.

دواتر لە میانی چاوپێکەوتنێکیدا لە سالێ ٢٠٠٩ بۆ کەناڵی ٣٣، میسی گوتی: "خۆشەویستێکم ھەیە و لە ئەرجەنتین دەژی و دڵخۆش و ئاسوودەم لەگەڵیدا".

میسی و رۆکوزۆ خاوەنی دوو منداڵن بە ناوەکانی تیاگۆ و ماتیۆ.