یه‌كێتی و پارتی و هێزه‌ سوونه‌كان له‌كۆبوونه‌وه‌دان

هه‌ولێر-AA

ئێواره‌ی ئه‌مرۆ یه‌كشه‌ممه‌، شاندی مه‌كته‌بی سیاسی و سه‌ركردایه‌تی پارتی دیموكراتی كوردستان و یه‌كێتی نیشتمانی كوردستان له‌باره‌گای مه‌كته‌بی سیاسی یه‌كێتی نیشتمانی كوردستان له‌ شاری هه‌ولێر پێشوازییان له‌ شاندێكی هاوپه‌یمانی "المحور الوطنی" كرد كه‌ نزیكه‌ی 50 كورسیی ئه‌نجوومه‌نی نوێنه‌رانی عێراقییان هه‌یه‌ و نوێنه‌رایه‌تی به‌شێك له‌ سوونه‌كانی عێراق ده‌كه‌ن.

شانده‌كه‌ی یه‌كێتی و پارتی چه‌ندین ئه‌ندامی مه‌كته‌بی سیاسی هه‌ردوو حزبی له‌خۆگرتبوو كه‌ لایه‌ن یه‌كێتیی نیشتمانی كوردستان بریتیی بوون له‌، سه‌رۆكی ده‌سته‌ی كارگێڕیی مه‌كته‌بی سیاسی، مه‌لا به‌ختیار، ئه‌ندامانی مه‌كته‌بی سیاسی سه‌عدی ئه‌حمه‌د پیره‌، ئه‌رسه‌لان بایز، هه‌روه‌ها ئه‌ندامی سه‌ركردایه‌تی، هه‌رێم كه‌مال ئاغا، له‌لایه‌ن پارتییشه‌وه‌ هه‌ریه‌ك له‌ ئه‌ندامانی مه‌كته‌بی سیاسی ئه‌و حزبه‌ هۆشیار زێباری، مه‌حموود محه‌مه‌د، ئه‌ندامی سه‌ركردایه‌تی هێمن هه‌ورامی و هه‌ریه‌ك له‌ سه‌رۆكی دیوانی سه‌رۆكایه‌تی هه‌رێم فوئاد حوسێن و گوته‌بێژی سه‌رۆكایه‌تی هه‌رێمیش ئومێد سه‌باح ئاماده‌ی كۆبوونه‌وه‌كه‌ بوون.

هاوكات شاندی میوانیش له‌هه‌ریه‌ك له‌ خه‌میس خه‌نجه‌ر، سه‌لیم جبوری، جه‌مال ئه‌لكه‌ربولی و نه‌وفل عاكوب. ئه‌حمه‌د ئه‌لجبوری پێكهاتبوون.
شاندی هه‌ردوولا له‌ ئێستادا له‌ كۆبوونه‌وه‌دان و بڕیاره‌ پاش ته‌واوبوونی كۆبوونه‌كه‌ كۆنگره‌یه‌كی رۆژنامه‌وانی بۆ خستنه‌ رووی ئه‌نجامی كۆبوونه‌وه‌كانی یه‌كێتی و پارتی و شاندی سوونه‌كان رێكبخرێت.