پلانی پەرەپێدانی ستراتیژی پارێزگای هەولێر راگەیەندرا

لەسەر قەڵای شاری هەولێر، لە ژێر دروشمی پایتەختی لێبوردەیی و پێکەوەژیان، پارێزگای هەولێر و پرۆگرامی گەشەپێدانی ناوچە خۆجێیەکان پلانی ستراتیژییان بۆ ماوە سێ ساڵ راگەیاند کە تێیدا یەکێتیی ئەورووپا لایەنی دارایی لە ئەستۆ دەگرێت و حکوومەتی هەرێمی کوردستان هاوکاری تەکنیکی و دارایی لە ئەستۆ دەگرێت و هاوکات لەلایەن رێکخراوی UNDP جێبەجێ دەکرێت.

رێڕەسمەکە بە ئامادەبوونی سەرۆکی ئەنجوومەنی وەزیرانی حکوومەتی هەرێمی کوردستان نێچیرڤان بارزانی و وەزیر و پەرلەمانتارانی ھەرێمی کوردستان و کونسوڵ و نوێنەرانی وڵاتانی بیانی و ڕێکخراوەکانی سەر بە نەتەوە یەکگرتووەکان لە ھەرێمی کوردستان و عێراق و بەرپرسانی حزبی و حکوومی و ھاووڵاتیانی پێکھاتە جیاوازەکانی کوردستان و شاری ھەولێر، لەسەر قەڵای دێرینی ئەم شارە بەڕێوەچوو.لە رێوڕەسمەکەدا پلانی ستراتیژیی پەرەپێدانی پارێزگای ھەولێر بۆ ماوەی سێ ساڵ لە ٢٠١٦ - ٢٠١٨ ڕاگەیەنرا.
لە دەستپێکی رێوڕەسمەکەدا پارێزگاری هەولێر نەوزاد هادی تیشکی خستە سەر ناوەڕۆکی پلانەکە و ئاماژەی بەوە کرد کە ئەم پلانە هەموو سێکتەرەکان دەگرێتەوە و ئەمەش رەنگدانەوەی لەسەر کولتووری پێکەوەژیان و پێشخستنی شاری هەولێر دەبێت.

پارێزگاری هەولێر نەوزاد هادی لە لێدوانێکی تایبەتدا بۆ ئاژانسی ئانادۆڵو گوتی: "ئەمە پلانی سێ ساڵەی هەولێرە کە هەموو سێکتەرەکان لە خۆ دەگرێت لە چۆنییەتی پێشخستنی هەولێر بە شێوەیەکی ئاسۆیی لە هەر کەرتێک بێت کاراکردنی بازاڕ و ئەوانەی کاردانەوە و رەنگدانەوەیان لەسەر پێشخستنی هەولێر دەبێت بۆ ساڵی 2020 کە وەزارەتی پلاندانان ئامادەی کردووە و لە هەمانکاتدا ئەم رەنگدانەوەی کولتووری پێکەوە ژیان لە چوارچیوەی پلانەکە داڕێژڕاوە".

پاشان بەرپرسی کۆمسیۆنی باڵای بوژانەوەی قەڵای ھەولێر دارا یەعقوبی لە گوتەیەکدا رایگەیاند: "ئەمڕۆ ھەموو بە یەکەوە بە شانازییەوە راوەستاوین بۆ ئەوەی پێکەوە ژیان قبووڵ بکەین، ھەروەھا فرەرەنگ و فرەچەشنی لە کولتوور و ئایین و نەتەوە قبووڵ بکەین، ئێمە پێکەوە وەستاوین لە زۆر بۆنە مێژووییەکاندا بەیەکەوە، کە ئەمەش ئەوە دەسەلمێنێت کە هەموو نەتەوەکان مێژوویەکی کۆنیان هەیە".

لە ڕێوڕەسمەکەدا دوای پێشکەشکردنی چەند گوتەیەک لەلایەن ئامادەبووانەوە، سەرۆکی ئەنجوومەنی وەزیرانی ھەرێمی کوردستان گوتەیەکی پێشکەش کرد و تیایدا جیا لە دەربڕینی خۆشحاڵیی خۆی بە ڕاگەیاندنی پلانی ستراتیژیی پەرەپێدانی پارێزگای ھەولێر بۆ ساڵانی ٢٠١٦ - ٢٠١٨، ھەروەھا ھیوای خواست کە پلانەکە بەپێی کات و خشتەی دیاریکراوی خۆی جێبەجێ بکرێت و بەو ھۆیەوە شاری ھەولێر بگوازێتەوە بۆ قۆناغێکی دیکەی پەرەپێدان و پێشکەوتن کە گوزارشت لە پێگە و ناو و کولتوور و مێژووی ئەم شارە دێرینە بکات.

ھەروەها سەرۆکی ئەنجوومەنی وەزیران ئاماژەی بەوەش دا کە حکوومەتی ھەرێمی کوردستان پێشتر پلانێکی گشتگیری بۆ پەرەپێدانی تەواوی ھەرێمی کوردستان ئامادە کردووە کە تیایدا دیدگای حکوومەت بۆ چۆنیەتیی پەرەپێدان و بەرەو پێشبردنی ھەرێمی کوردستان تا ساڵی ٢٠٢٠ خراوەتە ڕوو بە ھاوکاری و بەشداریی لایەنە پسپۆڕ و تایبەتمەندە نێودەوڵەتییەکان ئامادە کراوە و دابەشی سەر چەند قۆناغێک کراوە.

لە درێژەی گوتەکەیدا نێچیرڤان بارزانی دووپاتی کردەوە کە ھەرچەندە دۆخی نەخوازراوی وەک شەڕی دژەتیرۆر و قەیرانی دارایی، کاریگەریی خراپیان لەسەر بەڕێوەچوون و جێبەجێکردنی پلانەکە ھەیە، بەڵام ھەموو ئەمانە حکوومەتی ھەرێمی کوردستان و لایەنە نێودەوڵەتییە ھاوکارەکانی حکوومەتیان لە جددییەت و بەردەوامیدان بە ئەنجامدان و جێبەجێکردنی پلانی پەرەپێدانی ھەرێمی کوردستان، سارد نەکردووەتەوە و سووڕن لەسەر کارکردن بۆ پەرەپێدان و پێشخستنی کوردستان و مرۆڤ لەم وڵاتە و خواست و عیشق و ئیرادەی خەڵکی کوردستان بۆ بنیادنان و پێشکەوتن، لە ھەموو سەختی و دژوارییەکان بەھێزترە. ھەروەھا ھیوای خواست لە کاتی خۆیدا ئەم ڕێوڕەسمە بۆ پەرەپێدان و پێشخستن، بەپێی ئەو پلانەی ئامادە کراوە، لە ھەموو شار و ناوچەکانی دیکەی کوردستان ئەنجام بدرێت.

پاشان نێچیرڤان بارزانی تیشکی خستە سەر مێژووی قەڵای هەولێر وەکو یەکێک لە دێرینترین و کۆنتریین شارەکانی دونیایە و زیاتر لە شەش ھەزار ساڵە بێ بڕانەوە ژیان تیایدا بەردەوامە و دەیان قۆناغی مێژوویی بڕیووە و شارستانیی جیاواز و ئایین و ئایینزای جیاوازی لە ئامێز گرتووە و چەندین بەسەرھات و ڕووداوی مێژوویی بەڕێ کردووە و ھەموو ئەمانەش بەرھەمهێنەری کولتوورێکی فرە رەنگ و دەوڵەمەندی پێکەوەژیان و لێبوردەییی ئایینی و نەتەوەیی بووە کە قۆناغەکانی بڕوا سەرەتاییە جیاکان و بەرلە ئایینە ئاسمانییەکان و، ھەموو ئایینە ئاسمانییەکانیشی بینیووە و لەگەڵ ھەموواندا ژیاوە، بۆیە ‌ کولتووری فرە رەنگیی ئایینی و نەتەوەیی لە سەردەم و ساڵانی زووەوە لەم قەڵایەدا کەڵەکە بووە و بووەتە خاوەن کولتوورێکی دەوڵەمەند و ھەمەڕەنگی پێکەوەژیانی ئایین و ئایینزا و نەتەوە جیاکان و هاوکات ئەوەشی دووپات کردەوە کە پێکەوەژیانی قەڵای ھەولێر تەنیا لە سنووری قەڵادا نەماوەتەوە، بەڵکوو بە ھۆی کاریگەری و بەھێزیی پێگەی قەڵا کە شوێنی نوخبەی شارستان، خوێندەواران، ڕۆشنبیران، مامۆستایانی ئایینی، نووسەران، ھونەرمەندان و چینە پێشکەوتووەکانی کۆمەڵگە بووە، کاریگەری لەسەر تەواوی شار و بڵاوبوونەوەی ئەو کولتوورە ھەبووە. ھەر ئەو کولتوورەش یەکێک لە نھێنییەکانی مانەوە و بەردەوامیی ژیان بووە لە قەڵای ھەولێردا و ھەر ئەوەشە وای کردووە کە قەڵا ببێتە سیمبولی شاری ھەولێر و لەسەر ئاستی دنیا پێی بناسرێتەوە.

ئەوەشی بیرھێنایەوە کاتێک لە ناوەڕاستی ساڵی ٢٠١٤ کۆمیتەی کولتوورە جیھانییەکانی سەر بە ڕێکخراوی یونسکۆی نەتەوە یەکگرتووەکان، وەک یەکێک لە شاکارە مرۆییەکانی جیھان، قەڵای ھەولێری خستە لیستی شاکارە مێژووییەکان و شوێنەوارە کەلەپوورییەکانی جیھانەوە، قەڵا بۆ ھەولێر و بۆ ھەرێمی کوردستان بەتایبەتی و ڕۆژھەڵاتی ناوەڕاست بە گشتی، بووە خاوەن پێگەیەکی گەورەتر.

پاشان سەرۆکی ئەنجوومەنی وەزیرانی حکوومەتی هەرێمی کوردستان جەختی لەوەش کردەوە کە ھەولێر زەمینەیەکی باش و لەباری پەرەپێدان و پێشخستنی تێدایە و بەھۆی ئەو پێشکەوتنانەوەش کە لە دوای ڕووخانی ڕژێمی بەعس لە ھەرێمی کوردستان بەگشتی و ھەولێر بەتایبەتی، ھەموو کەرت و لایەنەکانی ژیانی گرتەوە، ھەولێر بووە ناوەندێکی دیار لەسەر ئاستی ناوچەکە و جیھانیش، بۆیە شایانی ئەوەیە کە لە ھەموو ڕوویەکەوە گرنگی پێویستی پێ بدرێت.

ھەروەھا دووپاتی کردەوە کە خەون و خواستی حکوومەتی ھەرێمی کوردستان بۆ پەرەپێدان و پێشخستنی ھەموو کەرت و بوارەکانی ژیان لە ھەرێمی کوردستان، خەون و خواستێکی مەزنە و سەربارەی ئەوەی کە ھەندێ جار و لە قۆناغێکی دیاریکراودا، لەبەر دۆخی نەخوازراو و ھۆکاری دەرەوەی ئیرادەی حکوومەت، کەموکوڕی و کێشە دێنە پێشەوە، بەڵام ھەموو خەڵکی کوردستانی دڵنیا کردەوە کە لەسەر ئاوەدانکردنەوە، بنیاتنان، پێشخستن و پەرەپێدانی وڵات، ژیان و مرۆڤ لە ھەرێمی کوردستان بەردەوام دەبن و ڕاگەیاندنی پلانی ستراتیژیی پەرەپێدانی پارێزگای ھەولێریش بەڵگە و گەواھییە بۆ ئەو ڕاستییە..

لە کۆتایی گوتەکەیدا سەرۆکی ئەنجوومەنی وەزیرانی حکوومەتی ھەرێمی کوردستان سڵاو و دروودی بۆ گیانی پیرۆزی شەھیدان و پێشمەرگە قارەمانەکانی کوردستان نارد کە بە گیانی پاک و خوێنی گەشیان ‌کوردستانیان پاراستووە و دەیپارێزن، ھەروەھا بەبۆنەی جەژنی سەری ساڵی ئێزدییەکان جەژنی چوارشەممە سووری پیرۆزکرد و پیرۆزبایی ئاراستەی ھەموو تاکێک لە کوردانی ئێزدی کرد و دروودی بۆ گیانی ھەموو شەھیدان و قوربانیانی ئێزدی نارد و دووپاتی کردەوە کە لەسەر ھەوڵەکانیان بۆ ئازادکردنی خوشک و برایانی ئێزدی لە دەستی تیرۆرستان بەردەوام دەبن، ھەموو ھەوڵێکیش دەدەن بۆ ئەوەی لە ئاستی نێودەوڵەتیدا کەیسی ئەوان وەک جینۆساید بناسرێت و حکوومەتی ھەرێمی کوردستان ھەموو تواناکانی خۆی بۆ ئاوەدانکردنەوەی ناوچە ئازادکراوەکانیان دەخاتە گەڕ.

دەقی وتاری سەرۆکی ئەنجوومەنی وەزیرانی حکوومەتی هەرێمی کوردستان:
"ئامادەبووانی بەڕێز،میوانانی خۆشەویست، ئێوارەتان باش، ھەموو لایەکتان بەخێر بێن.
بەخێرھاتنی تایبەتی و گەرمی خاتو گلەیت کلیمۆر جێگری کۆمسیۆنی باڵای مافەکانی مرۆڤی سەر بە نەتەوە یەکگرتووەکان کە لە جنێفەوە تەشریفی ھێناوە بۆ کوردستان دەکەم. بەخێرھاتنی خاتوو لیزا گراندی جێگری نوێنەری تایبەتی سکرتێری گشتیی نەتەوە یەکگرتووەکان لە عێراق، بەڕێزان باڵوێزی بەلجیکا و ھەڵسوڕێنەری کاروباری باڵوێزخانەی لوبنان لە عێراق و کونسوڵ و نوێنەرایەتی وڵاتانی بیانی و ڕێکخراوەکانی نێودەوڵەتی کە لە ھەرێمی کوردستانن، ھەمووتان بەخێربێن و ئێوارەتان باش.

خۆشحاڵم کە ئەم ئێوارە بەھارییە،‌ لە شاری ھەولێری خۆشەویست، لە بۆنەیەکی گرنگدا بۆ پایتەختی ھەرێمی کوردستان و دانیشتوانی، لە ھەموو پێکھاتە نەتەوەیی و ئایینییەکان، پێکەوەین. ھیوادارین ڕاگەیاندنی پلانی ستراتیژیی پەرەپێدانی پارێزگای ھەولێر بۆ ساڵانی ٢٠١٦ ـ ٢٠١٨ بەپێی کات و خشتەی دیاریکراوی خۆی جێبەجێ بکرێت و جێبەجێکردنی ئەم پلانە، شاری ھەولێر بگوازێتەوە قۆناغێکی دیکەی پەرەپێدان و پێشکەوتن، کە شایەنی پێگە و ناو و کەلتوور و مێژووی ئەم شارە دێرینە بێت.

حکوومەتی ھەرێمی کوردستان پێشتر پلانێکی گشتگیری بۆ پەرەپێدانی تەواوی ھەرێمی کوردستان ئامادە کردووە کە تیایدا دیدگای حکوومەت بۆ چۆنیەتیی پەرەپێدان و بەرەوپێشبردنی ھەرێمی کوردستان تا ساڵی ٢٠٢٠ خراوەتە ڕوو. ئەم پلانە بە ھاوکاری و بەشداریی لایەنە پسپۆڕ و تایبەتمەندە نێودەوڵەتییەکان ئامادە کراوە و دابەشی سەر چەند قۆناغێک کراوە. ئەم پلانەی ئەم ئێوارەیەش لەم ڕێوڕەسمەدا بۆ پەرەپێدانی شاری ھەولێر ڕادەگەیەنرێت، بە شێوەیەکی سەرەکی پشتی بەو دیدگا ئاییندەییە و بەو پلانە ستراتیژییە بەستووە کە حکوومەت بۆ ساڵی ٢٠٢٠ی ئامادە کردووە.

پلانی حکوومەت فراوان و گشتگیرە و بەپێی پێویستی و ئەولەوییەت و قۆناغ بە قۆناغ، بەمەبەستی پەرەپێدان و پێشخستن، تەواوی بوارەکانی ژیان، بە ھەموو کەرت و خزمەتگوزارییەکانەوە، دەگرێتەوە.
ئەگەرچی دۆخی نەخوازراوی وەک شەڕی دژەتیرۆر و قەیرانی دارایی و لێکەوتەکانیان، کاریگەریی خراپیان لەسەر بەڕێوەچوون و جێبەجێکردنی پلانەکە ھەیە، بەڵام ھەموو ئەمانە حکوومەتی ھەرێمی کوردستان و لایەنە نێودەوڵەتییە ھاوکارەکانمان لە جددییەت و موکوڕی و بەردەوامیدان بە ئەنجامدان و جێبەجێکردنی پلانی پەرەپێدانی ھەرێمی کوردستان، سارد ناکاتەوە.

ئێمە لە ھەرێمی کوردستان، وێڕای ھەموو سەختییەکان سوورین لەسەر کارکردن بۆ پەرەپێدان و پێشخستنی کوردستان و مرۆڤ لەم وڵاتەدا. خواست و عیشق و ئیرادەی خەڵکی کوردستان بۆ بنیاتنان و پێشکەوتن، لە ھەموو سەختی و دژوارییەکان بەھێزترە. ھیوادارین وەک ئەوەی ئەمڕۆ لە ھەولێر دەکرێت، لە کاتی خۆیدا ئەم ڕێوڕەسمە بۆ پەرەپێدان و پێشخستن، بەپێی ئەو پلانەی ئامادە کراوە، لە ھەموو شار و ناوچەکانی دیکەی کوردستانیش ئەنجام بدرێت.

بەڕێزان..
ئێمە ئێستا لە یەکێک لە دێرینترین و کۆنترین شوێنەکانی دنیا وەستاوین، کە زیاتر لە شەش ھەزار ساڵە،‌ بەردەوام و بێ بڕانەوە ژیان تیایدا بەردەوامە. قەڵای ھەولێر کە یەکەم بناغەی دەسپێکردنی ژیانە لەم شارە، بە درێژاییی ھەزاران ساڵ، دەیان قۆناغی مێژوویی دەرباز کردووە و دەیان شارستانیی جیا و ئایین و ئایینزای جیای لە ئامێز گرتووە و، دەیان بەسەرھات و ڕووداوی مێژوویی بەڕێ کردووە. قۆناغ و سەردەمە جیاجیا مێژوویییەکان و ساڵانی دوور و درێژی ژیان لەم قەڵا و لەم شارە دێرینە، بەرھەمێنەری کەلتوورێکی فرەڕەنگ و دەوڵەمەندی پێکەوەژیان و لێبوردەییی ئایینی و نەتەوەیی بووە لەم شارە خۆشەویستەدا.

فرەڕەنگی، پێکەوەیی و لێبوردەیی لەم شارە و بەتایبەتیش لە قەڵای ھەولێردا کە یەکەم لانەی ژیان بووە و دەسەڵات و شارستانیەت و ئیمپراتۆریەتەکانی مێژوو و، قۆناغەکانی بڕوا سەرەتاییە جیاکان و، بەر لە ئایینە ئاسمانییەکان و، ھەموو ئایینە ئاسمانییەکانیشی بینیووە، کەنیسەتی جوولەکە و کڵێسای مەسیحییەکان و مزگەوتی موسڵمانانیشی بینیوە و لەگەڵ ھەموواندا ژیاوە. بۆیە بەرە بەرە کەلتووری فرەڕەنگیی ئایینی و نەتەوەیی لە سەردەم و ساڵانی زووەوە لەم قەڵایەدا کەڵەکە بووە و ئیتر قەڵا بە شێوەیەکی مێژووکردە، بووەتە خاوەن کەلتوورێکی دەوڵەمەند و ھەمەڕەنگی پێکەوەژیانی ئایین و ئایینزا و نەتەوە جیاکان لەم شارەدا.

شێوازی ژیان و کولتووری شار و ئەو پێکەوەژیانەی لە قەڵادا ھەبووە،‌ ھەر بە تەنیا لە سنووری قەڵادا نەماوەتەوە، بەڵکوو بە ھۆی کاریگەری و بەھێزیی پێگەی قەڵا کە شوێنی ئێلیت و نوخبەی شارستان، خوێندەواران، ڕۆشنبیران، مامۆستایانی ئایینی، نووسەران، ھونەرمەندان و چینە پێشکەوتووەکانی کۆمەڵگە بووە، کاریگەری لەسەر تەواوی شار و بڵاوبوونەوەی ئەو کەلتوورە لە ھەموو شوێنێکدا ھەبووە. ھەر ئەو کەلتوورەش یەکێک لە نھێنییەکانی مانەوە و بەردەوامیی ژیان بووە لە قەڵای ھەولێردا. ھەر ئەوەشە وای کردووە کە قەڵا ببێتە سیمبۆلی شاری ھەولێر و لەسەر ئاستی دنیا پێی بناسرێتەوە.

کاتێکیش ناوەڕاستی ساڵی ٢٠١٤ کۆمیتەی کەلتوورە جیھانییەکانی سەر بە ڕێکخراوی یونسکۆی نەتەوە یەکگرتووەکان، وەک یەکێک لە شاکارە مرۆییەکانی جیھان، قەڵای ھەولێری خستە لستی شاکارە مێژووییەکان و شوێنەوارە کەلەپوورییەکانی جیھانەوە، قەڵا بۆ ھەولێر و بۆ ھەرێمی کوردستان بەتایبەتی و، ڕۆژھەڵاتی ناوەڕاست بەگشتی، بووە خاوەن پێگەیەکی گەورەتر و لە تەک کەلتووری پێکەوەژیان و لێبوردەیی کە بووەتە مایەی ڕێز و شانازیی خەڵکی کوردستان لەسەر ئاستی جیھان، ئەویش بووە شانازییەکی دیکە بۆ ھەرێمی کوردستان و خەڵکی ھەولێر بەتایبەتی.

ھەولێر وەک پایتەختی ھەرێمی کوردستان و وەک یەکێک لە ھەرە کۆنترین شارەکانی جیھان، زەمینەیەکی باش و لەباری پەرەپێدان و پێشخستنی تێدایە. لە ڕووی پێکھاتەی نەتەوەیی و ئایینییەوە شارێکی تێر و دەوڵەمەندە و، نموونەیەکی جوان و سەرکەوتووی پێکەوەژیان و لێبوردەیی و ھەمەڕەنگیی کەلتووری و کەلەپووری و ئایینی و نەتەوەیییە لە کوردستان و عێراقدا. بەھۆی ئەو پێشکەوتنانەشەوە کە دوای ڕووخانی ڕژێمی بەعس لە ھەرێمی کوردستان بەگشتی و لە ھەولێر بەتایبەتی، ھەموو کەرت و لایەنەکانی ژیانی گرتەوە، ھەولێر بووە ناوەندێکی دیار لەسەر ئاستی ناوچەکە و جیھانیش، بۆیە شایانی ئەوەیە کە لە ھەموو ڕوویەکەوە گرنگی پێویستی پێ بدرێت و ئەو پلانەی بۆ پەرەپێدانی ئامادە کراوە، بە ڕێکوپێکی و سەرکەوتوویی جێبەجێ بکرێت.

خەون و تمووحی حکوومەتی ھەرێمی کوردستان بۆ پەرەپێدان و پێشخستنی ھەموو کەرت و بوارەکانی ژیان لە ھەرێمی کوردستان خەون و تمووحێکی مەزنە. لەوانەیە ھەندێ جار و لە قۆناغێکی دیاریکراودا، لەبەر دۆخی نەخوازراو و ھۆکاری دەرەوەی ئیرادەی حکوومەت، کەموکوڕی و کێشە بێنە پێشەوە و پلان و بەرنامەکانی حکومەت لەمبارەیەوە بە شێوەیەکی کاتی سست بکەنەوە، بەڵام لێرەوە، لەم بۆنەیەدا دەمەوێ ھەموو خەڵکی کوردستان و دۆستانمان دڵنیا بکەمەوە کە ئێمە لەسەر ئاوەدانکردنەوە، بنیاتنان، پێشخستن و پەرەپێدانی وڵات، ژیان و مرۆڤ لە ھەرێمی کوردستان بەردەوام دەبین.

ئەم ڕێوڕەسمە و ڕاگەیاندنی پلانی ستراتیژیی پەرەپێدانی پارێزگای ھەولێریش لە دۆخی ئەمڕۆی کوردستاندا، بەڵگە و گەواھییە بۆ ئەو ڕاستییەی کە حەز و ئیرادەی خەڵکی کوردستان بۆ ژیان، بۆ پێشکەوتن، بۆ بنیاتنان و ئاوەدانی، بۆ پێکەوەژیان و لێبوردەیی، زۆر لە ئیرادەی شەڕانگێزیی ئەوانە بەھێزترە کە بە ھەموو شێوەیەک دەیانەوێ و بێھوودە ھەوڵ دەدەن، کاروانی پێشکەوتنی کوردستان ڕابگرن.

کوردستانێک کە بابوباپیرانمان، لە ھەموو پێکھاتە نەتەوەیی و ئایینییەکانی ئەم وڵاتە،‌ بە گیان و خوێنی خۆیان دروستیان کردووە، ئەمڕۆش ڕۆڵەکانی لە ھەموو پێکھاتەکان، پێشمەرگەن و دیسان بە گیان و خوێنی خۆیان دەیپارێزن، بە ھیچ شێوەیەک لە پێشکەوتن و بەرەوپێشچوون ناوەستێت و ھەر بەردەوام دەبێت.

لە کۆتاییدا سڵاو و دروود بۆ گیانی پیرۆزی شەھیدانی کوردستان کە بە گیانی پاک و خوێنی گەشیان، ‌کوردستانیان پاراست. سڵاو لە پێشمەرگە قارەمانەکانی کوردستان، کە ئەمڕۆ لە بەرەکانی جەنگی دژەتیرۆردا، کوردستان و پێشکەوتنەکانی، بەھا بەرزەکانی، کەلتوور، پێکەوەیی و لێبوردەییی پێکھاتەکانی، مرۆڤ و مرۆڤایەتی دەپارێزن.

دەستخۆشی لە ڕێکخەرانی ئەم ڕێوڕەسمە، پرۆگرامی ناوچە خۆجێیەکانی سەر بە نەتەوە یەکگرتووەکان UNDP، یەکێتیی ئەورووپا، پارێزگای ھەولێر و کۆمیسیۆنی باڵای بووژاندنەوەی قەڵای ھەولێر دەکەین و سوپاسیان دەکەین بۆ داوەتکردنمان. سوپاس و دەستخۆشی بۆ وەزارتی پلاندانی حکوومەتی ھەرێمی کوردستان و جەنابی وەزیر کە دەبوایە لەو مەراسیمەدا بەشدار بێت، بەڵام بەداخەوە لە ئەمەریکایە و نەیتوانیوە بگاتە ئێرە، سوپاسی دەکەین بۆ ئەو کارانەی کە کردوویەتی.

سوپاس و دەستخۆشییەکی تایبەت بۆ بەڕێز نەوزاد ھادی پارێزگاری ھەولێر کە دڵسۆزانە و بە شێوەیەکی سەرکەوتووانە، کاروباری پارێزگای ھەولێری بەڕێوە بردووە و، ڕۆڵێکی دیار و سەرەکی لە پێشخستن و پەرەپێدانی پارێزگاکەدا گێڕاوە و دەگێڕێت، ھیوای سەرکەوتنی بۆ دەخوازم و ھیوادارم بەردەوام بێت لە ھەوڵی خۆی بۆ پێشخستنی پارێزگای ھەولێر بەشێوەیەکی گشتی و دەستخۆشی لەخۆی و ھەڤاڵانی و ئەوانەی یارمەتی دیدەن دەکەم و سوپاسیان دەکەم و ھیوادارم بەردەوام بن لە کارەکانیان.

ئەمڕۆ، جەژنی سەری ساڵی خوشک و برایانی ئێزدیمان ـ چارشەمبوا سۆرە ـ بەم بۆنەیەوە، پیرۆزباییان لێدەکەم، ھەموو شەھیدان و قوربانیانی ئێزدی بەبیر دەھێنینەوە و دووپات دەکەینەوە کە لەسەر ھەوڵەکانمان بۆ ئازادکردنی خوشک و برایانی ئێزدیمان لە دەستی تیرۆرستانی داعش بەردەوام دەبین، ھەموو ھەوڵێکیش دەدەین بۆ ئەوەی لە ئاستی نێودەوڵەتیدا کەیسی ئەوان وەک جینۆساید بناسرێت و حکوومەتی ھەرێمی کوردستان ھەموو تواناکانی خۆی بۆ ئاوەدانکردنەوەی ناوچە ئازادکراوەکانیان دەخاتە گەڕ".