مەسعود بارزانی پێشوازیی لە باڵیۆزی ئێران لە عێراق کرد

هەولێر - AA

سەرۆکی پێشووی هەرێمی کوردستان، مەسعود بارزانی پێشوازیی کرد لە باڵیۆزی ئێران لە عێراق، ئیرەج مەسجدی.

بەگوێرەی ئەو راگەیەندراوەی کە لە بارەگای بارزانی بڵاوکراوەتەوە، لە دیدارەکەدا بارودۆخی سیاسی عێراق و دەرئەنجامەکانی هەڵبژاردن و هەنگاوەکانی لەیەکتر نزیکبوونەوی لایەنە عێراقییەکان تاوتوێ کرا.

لە راگەیەندراوەکەدا ئاماژە بەوەشدراوە کە هەر لەو کۆبوونەوەیەدا جەخت لە جێبەجێکردنی هەرسێ پڕەنسیپی شەراکەت و سازان و هاوسەنگی لە حوکمڕانیی عێراق کرایەوە ئەوەیش لە پێناو بەدیهێنانی سەقامگیریی و بووژاندنەوە و راستەڕێبوونی پڕۆسەی سیاسی عێراق.

پەیوەندییەکانی نێوان هەرێمی کوردستان و ئێران و پەرەپێدانی پەیوەندییەکان لە بواری ئابووری و بازرگانی و کولتووری تەوەری دیکەی ئەو کۆبوونەوەیە بوون.