مەسعود بارزانی پێشوازی لە راوێژکاری ئاسایشی نیشتمانی عێراق دەکات

هەولێر - AA

سەرۆکی پارتی دیموکراتی کوردستان، مەسعود بارزانی پێشوازی لە راوێژکاری ئاسایشی نیشتمانی عێراق، فاڵح فەیاز و شاندێکی یاوەری کرد.

ماڵپەڕی فەرمی مەسعود بارزانی بڵاویکردەوە کە لە دیدارێکدا بارودۆخی سیاسیی و دوا پێشھاتە ئەمنی و سیاسییەکان لەسەر ئاستی عێراق و ناوچەکە تاوتوێکراوە و رۆشناییش خراوەتە سەر مانەوەی ھەڕەشەی تیرۆر و کاریگەرییەکانی لەسەر ناسەقامگیری و ئاسایشی عێراق و ناوچەکە.

ئاماژە بەوەشکراوە کە لە بەشێکی دیدارەکەدا پەیوەندییەکانی ھەولێر و بەغدا خراونەتە بەر باس و جەختکراوەتەوە لەسەر بەردەوامی و پتەوترکردنی ئەو پەیوەندییانە لە پێناو چارەسەرکردنی بنەڕەتیی کێشەکانی نێوان ھەردوولا.

ھەروەها بیروڕا لەبارەی گرژی و خۆپێشاندانەکانی بەغدا و پارێزگاکانی باشووری عێراق ئاڵوگۆڕ کراوە و ھەردوولا پاڵپشتیی خۆیان بۆ سەرۆکوەزیرانی عێراق دووپاتکردووەتەوە لە جێبەجێکردنی چاکسازی و داوکارییە رەواکانی ھاووڵاتییان و خۆپێشاندەران.