مووسڵ..هاووڵاتییان سه‌رقاڵی چاككردنه‌وه‌ی وێرانه‌یی شه‌ڕن

هه‌ولێر-AA
مووسڵ ئێستا ئه‌و شاره‌یه‌ كه‌ خه‌ریكه‌ له‌ شه‌ڕ لێ ده‌بێته‌وه‌، به‌ڵام وێرانكارییه‌كان ره‌نگه‌ له‌ هه‌ندێك شوێن كه‌م بن، به‌ڵام له‌ زۆر شوێنیش سەد له‌سه‌د ده‌بن.
زه‌ید گه‌نجێكی دانیشتووی مووسڵه‌، ئه‌و له‌ سییه‌كانی ته‌مه‌نیدایه‌، ئه‌و كاته‌ی ئێمه‌ چووینه‌ ناو خانووه‌كه‌یانه‌وه‌ له‌ گه‌ڕه‌كی مووسڵی نوێ ئه‌و له‌گه‌ڵ دوو له‌ برا و سێ له‌ خزمانی و وه‌ستایه‌كی چاككردنی خانوو و ئاسنگه‌رێك سه‌رقاڵی لابردنی خاشاك و پاشماوه‌ رووخاوه‌كانی به‌شێك له‌ خانووه‌كه‌ی زه‌ید بوون كه‌ به‌ هۆی بۆمبێكی فڕۆكه‌كانی هاوپه‌یمانی نێودەوڵەتی دژ بە داعش پێش دوو مانگ له‌مه‌وبه‌ر كرایه‌ ئامانج.
زه‌ید كۆمه‌ڵێك بلۆكی له‌ناو خانووه‌كه‌دا ریزكردبوو و ئاسنگه‌ریش له‌و دیوه‌وه‌ ئه‌و شوێنانه‌ی چاك ده‌كرده‌وه‌ كه‌ زیانییان به‌ركه‌وت بوو، زه‌ید بۆ ئاژانسی ئانادۆڵو باسی له‌وه‌ده‌كرد کە خانووه‌كه‌یان زیانی گه‌وره‌ی به‌ركه‌وتووه‌.
ئه‌و گه‌نجه‌ كه‌ ریشێكی ته‌نكی داناوه‌ به‌ خه‌مبارییه‌وه‌ له‌ناو ژووره‌كانی خانووه‌كه‌ی به‌دوای ئه‌و شتانه‌دا ده‌گه‌ڕا كه‌ یادگاریی رۆژانی پێشتر بوون بۆ ئه‌وه‌ی بیانپارێزێت، به‌ڵام ئه‌وه‌ی بۆی ده‌ركه‌وت جگه‌ له‌ چه‌ند پارچه‌ كه‌لوپه‌لێكی كه‌م زۆرینه‌ی یادگارییه‌كانی رۆیشتوون.

ئه‌و بۆ ئاژانسی ئانادۆڵو گوتی: "دوو مانگ له‌مه‌وبه‌ر دوای ئه‌وه‌ی چه‌كدارانی داعش له‌ناو گه‌ڕه‌كه‌كه‌ی ئێمەدا "مووسڵی نوێ" هه‌ڵیانكوتایه‌ سه‌ر چه‌ند خانوویه‌ك و چوونه‌ته‌ سه‌ربانه‌كانییان تا له‌وێ قه‌ناسبه‌ده‌سته‌كانییان جێگیر بكه‌ن و رێگریی له‌ پێشڕه‌ویی هێزه‌كانی عێراق بكه‌ن، ئیدی من و خانه‌واده‌كه‌م كه‌ سێ براین له‌م خانووه‌دا نیشته‌جێ بووین به‌ ناچاری به‌ره‌و گه‌ڕه‌كی دواوه‌ی خانووه‌كه‌مان و به‌ دیاریكراوی بۆ ماڵی خزمێكی خۆمان خانووه‌كه‌مان به‌جێ هێشت".
زه‌ید بۆ ئاژانسی ئانادۆڵو گوتیشی: "دواتر ماوه‌یه‌كی زۆر كه‌م مووشه‌كی فڕۆكه‌كان خانووه‌كه‌ی ته‌نیشتی ئێمه‌ی كرده‌ ئامانج به‌ هۆی بوونی داعشه‌وه‌ لێی و دواتریش چه‌ندین خانووی ده‌ورووبه‌ری ئه‌م شوێنه‌ زه‌ره‌ریان به‌ركه‌وت له‌نێویاندا خانووه‌كه‌ی ئێمه‌".

له‌ 10ی حوزه‌یرانی ساڵی 2014 دا چه‌كدارانی داعش شاری مووسڵیان كۆنتڕۆڵ كرد، دوای مانه‌وه‌یان بۆ نزیكه‌ی سێ ساڵ، ئێستا ئۆپه‌راسیۆنه‌كانی رزگاركردنی شاره‌كه‌ كه‌ زیاتر له‌ هه‌شت مانگ ده‌بێت ده‌ستی پێكردووه‌ له‌ كۆتاییه‌كانی نزیك ده‌بێته‌وه‌ و داعش ته‌نها له‌ چه‌ند سه‌د مه‌ترێكی كه‌م ده‌سه‌ڵاتی هه‌یه‌ و، خه‌لافه‌ته‌كه‌شی به‌ره‌و كۆتایی ده‌ڕوات.

ئه‌و گه‌نجه‌ كه‌ ئێستا سه‌رقاڵی چاككردنه‌وه‌ی خانووه‌كه‌یه‌تی له‌گه‌ڵ هه‌موو خه‌مه‌كانیدا باسی له‌وه‌ده‌كرد گرنگ خۆی و براكانی و خانه‌واده‌كه‌ی به‌ سه‌لامه‌ت ده‌رچوون، ده‌شیگوت "ئیدی ژیان هه‌رچه‌نده‌ تاڵ بێت هه‌ر ده‌بێت له‌ خاڵێكدا ده‌ست پێبكه‌ینه‌وه‌، هه‌روا دانانیشین، خانووه‌كه‌مان چاك ده‌كه‌ینه‌وه‌ و دوكانی جلوبه‌رگیش وه‌كو جاران ده‌كه‌ینه‌وه‌ و ئیدی به‌ بێ داعش ژیانێكی نوێ ده‌ست پێده‌كه‌ینه‌وه‌".
هاوشێوه‌ی زه‌ید له‌ مووسڵ زۆرن كه‌ به‌ هۆی كرده‌ سه‌ربازییه‌كانه‌وه‌ خانوو و شوێنه‌ بازرگانییه‌كانییان زیانییان پێگه‌یشتووه‌، به‌شێكیان به‌ تایبه‌ت له‌و گه‌ڕه‌كانه‌ی كه‌ زیانی كه‌مترییان به‌ به‌راورد له‌گه‌ڵ ئه‌وانی تر پێگه‌یشتووه‌ سه‌رقاڵی نۆژه‌نكردنه‌وه‌ و چاككردنه‌وه‌ی ئه‌و شوێنانه‌ی خانووه‌كانییانن كه‌ زیانییان پێگه‌یشتووه‌.

موسڵاوییه‌كان ده‌ڵێن سه‌رباری زۆری نه‌هامه‌تییه‌كان و قورسی ژیانییان، به‌ڵام هه‌ر ده‌بێت ده‌ست پێ بكه‌نه‌وه‌، هه‌ر بۆیه‌ لێره‌ و له‌وێ كه‌م كه‌م ده‌بینرێت كه‌ به‌شێك له‌ هاووڵاتییانی شاره‌كه‌ خه‌ریكی چاككردنه‌وه‌ی وێرانكارییه‌كانن، به‌شێكیان له‌سه‌ر جاده‌كان خه‌ریكی پاككردنه‌وه‌ی شه‌قامه‌كانن، به‌شێكیان بۆرییه‌ شكاوه‌كان چاك ده‌كه‌نه‌وه‌، به‌شێكیان كاره‌با، ئیدی به‌و شێوه‌یه‌ ده‌یانه‌وێت له‌گه‌ڵ ریتمه‌كانی ژیان جارێكی تر ده‌نگ هه‌ڵببڕنه‌وه‌.