مه‌ترسی له‌سه‌ر قه‌واره‌ی هه‌رێمی كوردستان هه‌بوو، پاراستمان

هه‌ولێر-AA

قوباد تاڵه‌بانی رایده‌گه‌یه‌نێت كه‌ پێویسته‌ كابینه‌ی داهاتووی حكوومه‌تی هه‌رێم و په‌رله‌مان كاربكه‌ن بۆ درێژه‌پێدان به‌و چاكسازییانه‌ی كابینه‌ی هه‌شته‌م ده‌ستی پێكردووه‌.

جێگری سه‌رۆكی حكوومه‌تی هه‌رێمی كوردستان قوباد تاڵه‌بانی رایده‌گه‌یه‌نێت چواری ساڵی رابردوو هه‌رێمی كوردستان به‌چه‌ندین قه‌یرانی وا تێپه‌ڕیوه‌ كه‌ ئه‌گه‌ر خه‌مخۆریی نه‌بایه‌ ئه‌وا بایی ئه‌وه‌نده‌ بوون كه‌ حكوومه‌ت بڕوخێنن، تاڵه‌بانی له‌وباره‌یه‌وه‌ رایده‌گه‌یه‌نێت "ئێمه‌ له‌ حكوومه‌تی هه‌رێمی كوردستان چوار ساڵی زۆر سه‌ختمان تێپه‌ڕاند، چوار ساڵ كه‌ پڕ بوو له‌ قه‌یران، پڕ بوو له‌ كێشه‌، له‌ جه‌نگ، له‌ قه‌یرانی ئابووری، له‌ قه‌یرانی دارایی، قه‌یرانی سیاسی، كێشه‌ی نێوخۆیی، كێشه‌ی ئیقلیمی، كێشه‌ی نێوده‌وڵه‌تی، ته‌نانه‌ت رووبه‌ڕووی بوومه‌له‌رزه‌ش بووینه‌وه‌، فشاره‌كانی ئه‌و چوار ساڵه‌ هه‌ر یه‌كه‌یان بایی ئه‌وه‌نده‌ بوو كه‌ ده‌یتوانی حكوومه‌تێك بڕوخێنێت، به‌ڵام به‌ پشتیوانی ئیراده‌ی گه‌له‌كه‌مان و به‌ خه‌مخۆری حكوومه‌ته‌كه‌مان و به‌ پشتیوانی به‌رپرسه‌كانمان كه‌ به‌رپرسانه‌ مامه‌ڵه‌یان له‌گه‌ڵ دۆخه‌كه‌دا كرد، ئێمه‌ توانییمان حكوومه‌ته‌كه‌ رابگرین و ده‌ست بكه‌ین به‌ به‌رنامه‌یه‌كی تۆكمه‌ی چاكسازی، كوردستانیش به‌ره‌و كه‌ناری ئارامی ببه‌ین".


تاڵه‌بانی سه‌باره‌ت به‌ كاریگه‌ریی قه‌یرانه‌كان له‌سه‌ر حكوومه‌تی هه‌رێمیش گوتی "یه‌كێك له‌ ده‌رئه‌نجامه‌ باشه‌كانی قه‌یرانه‌ یه‌ك له‌ دوای یه‌كه‌كان ئه‌وه‌ بووه‌ كه‌ ناچاری كردین ده‌ست ببه‌ین بۆ چاكسازی راسته‌قینه‌، پێم وایه‌ ئه‌گه‌ر بارودۆخی هه‌رێمی كوردستان ئاسایی بووایه‌ و دۆخی دارایی هه‌رێم هه‌روا به‌هێز بایه‌ وه‌كو ساڵانی 2019 تا 2012 ره‌نگبێت حكوومه‌ت وه‌كو پێویست ده‌ستی نه‌بردبا بۆ ئه‌و چاكسازییانه‌ی كه‌ ده‌ستی بۆ بردن، به‌ڵام قه‌یرانه‌كان ناچارییان كردین كه‌ ئێمه‌ راستگۆ بین له‌گه‌ڵ خۆمان و له‌گه‌ڵ گه‌له‌كه‌مان، به‌ڕێز سه‌رۆكی حكوومه‌ت، به‌نده‌، وه‌زیره‌ به‌ڕێزه‌كان هه‌مووان ده‌مانزانی ده‌بێت چی بكه‌ین، ده‌مانزانی ده‌بێت بڕیاری سه‌خت بده‌ین كه‌ ده‌بێت هه‌ندێكی له‌لایه‌ن خه‌ڵكی كوردستان ببێته‌ مایه‌ی دڵگرانی، ده‌مانزانی هه‌ندێك له‌ بڕیاره‌كانمان له‌هه‌ندێك به‌رژه‌وه‌ندیی ده‌دات، به‌ڵام نه‌مانهێشت ئه‌و ترس و فشار و ئه‌گه‌رانه‌ی له‌به‌رده‌مانه‌ ببێته‌ رێگر له‌به‌رده‌ممان بۆ ده‌ستبردن بۆ هه‌ندێك دۆسییه‌ كه‌ پێشتر بڤه‌ بوون".

جێگری سه‌رۆكی حكوومه‌تی هه‌رێمی كوردستان قوباد تاڵه‌بانی له‌درێژه‌ی قسه‌كانیدا له‌ په‌راوێزی دیداری ساڵانه‌ی ئینستیتیوتی رۆژهه‌ڵاتی ناوه‌ڕاست بۆ توێژینه‌وه‌"MERIمێری گوتیشی "له‌ چوار ساڵی رابردوو زۆرمان ئه‌نجامدا، یه‌كێك له‌ده‌ستكه‌وته‌كانی چوار ساڵی رابردوو پاراستنی قه‌واره‌ی هه‌رێمی كوردستان بوو كه‌ له‌ژێر مه‌ترسیدابوو، سه‌رباری ناكۆكی و نه‌بوونی یه‌كڕیزییه‌كی ته‌واو له‌نێو لایه‌نه‌ سیاسییه‌كان توانییمان كوردستان وه‌كو یه‌ك پارچه‌ بهێڵینه‌وه‌ سه‌رباری ئابڵوقه‌كانی سه‌ر كوردستان، سه‌رباری فشاره‌ ئابووری و سیاسی و ئه‌منییه‌كانی سه‌رمان، یه‌كڕیزی له‌ لووتكه‌ی حكوومه‌ت كاریگه‌ریی سه‌ره‌كی هه‌بوو بۆ نه‌هێشتنی تێكدانی قه‌واره‌ی هه‌رێمی كوردستان، سه‌رۆكی حكوومه‌ت و ئێمه‌ یه‌كڕیزییه‌كمان نیشانی خه‌ڵكی كوردستان و جیهان دا كه‌ پێمانگوتن ئێمه‌ به‌كرده‌وه‌یی دوورده‌كه‌وینه‌وه‌ له‌ ململانێ و ده‌وڵه‌تداری ده‌كه‌ین".

قوباد تاڵه‌بانی له‌درێژه‌ی قسه‌كانیدا ئه‌وه‌شی گوت "ئێمه‌ چاكسازی زۆری ئیداری و داراییمان داوه‌، به‌ڵام كۆتاییمان به‌ ئیشه‌كانمان نه‌هێناوه‌، زۆر زۆر ماوه‌ كه‌ ده‌بێت حكوومه‌تی داهاتووی هه‌رێمی كوردستان به‌ پاڵپشتیی په‌رله‌مانی داهاتوو ئه‌نجامی بده‌ن، ده‌بێت كابینه‌ی داهاتوو حكوومه‌ت بكات به‌ دامه‌زراوه‌یی و پێداچوونه‌وه‌یه‌كی بكات به‌و كارانه‌ی كه‌ له‌ ئاستی چاوه‌ڕوانیی خه‌ڵكی كوردستان و خۆیان بێت، به‌ كابینه‌ی داهاتوو ده‌ڵێم به‌رده‌وام بن له‌ چاكسازییه‌ راسته‌قینه‌كان".