MERI دیداری چواره‌می ساڵانه‌ی خۆی ده‌ستپێكرد

هه‌ولێر-AA
دیداره‌كه‌ له‌ رۆژی یه‌كه‌میدا چوار پانێڵ له‌خۆ ده‌گرێت و بڕیاره‌ سبه‌ینێ چوارشەممە، باڵیۆزانی چه‌ند وڵاتێك به‌شداریی تیادا بكه‌ن و باس له‌ ره‌وشی عێراق و رۆژهه‌ڵاتی ناوه‌ڕاست بكه‌ن، له‌نێویاندا باڵیۆزی توركیا له‌ عێراق فاتیح یڵدز.
به‌پێی به‌رنامه‌ی كاری دیداره‌كه‌ كه‌ به‌ناونیشانی" ئاڵوگۆڕی روانگه‌كان بۆ سه‌قامگیری له‌ رۆژهه‌ڵاتی ناوه‌ڕاست"ه‌، پانێڵی یه‌كه‌می به‌ناویشانی" ریفۆرم له‌ سیسته‌می حوكمڕانی، لامه‌ركه‌زییه‌ت و به‌دامه‌زراوه‌ییكردن"، ده‌بێت، هه‌رچی پانێڵی دووه‌مه‌ ناونیشانی" ده‌وڵه‌تسازی و نیشتمانسازی له‌ عێراق"، پانێڵی سێهه‌میش ناونیشانی" كوردستان له‌ رۆژهه‌ڵاتی ناڤیین"، و پانێڵی چواره‌میش ناونیشانی" یه‌كێتی ئه‌ورووپا له‌ رۆژهه‌ڵاتی ناڤیین، ده‌وڵه‌تسازی بۆ رێگرتن له‌ توندوتیژیی"ی هه‌ڵگرتووه‌.
سه‌رپه‌رشتیاری سه‌رچاوه‌ مرۆییه‌كانی ئینستیتیوتی رۆژهه‌ڵاتی ناوه‌ڕاست بۆ توێژینه‌وه‌"MERI" دكتۆر فوئاد سمایل له‌ لێدوانێكدا بۆ ئاژانسی ئانادۆڵو رایگه‌یاند "ئه‌مه‌ دیداری چواره‌می مێرییه‌ كه‌ ساڵانه‌ ئه‌نجامی ده‌دات، ئه‌مساڵ دیداره‌كه‌ ناونیشانی ئاڵوگۆڕی روانگه‌كان بۆ سه‌قامگیری له‌ رۆژهه‌ڵاتی ناوه‌ڕاست"ی هه‌ڵگرتووه‌ و چه‌ندین به‌رپرس له‌ حكوومه‌تی عێراق و حكوومه‌تی هه‌رێمی كوردستان به‌شدارن، جگه‌ له‌ په‌رله‌مانی عێراق و هه‌رێمی كوردستان، هه‌روه‌ها چه‌ندین پارێزگار لێره‌ هه‌ن، سه‌رباری پسپۆڕ گه‌لێكی زۆر و چه‌ندین به‌رپرس له‌ ئاستی دیكه‌ هه‌ن، مه‌به‌ست له‌م دیداره‌ گفتوگۆ كردن و خستنه‌ڕووی شێوازی حوكمڕانی و چه‌ندین بابه‌تی په‌یوه‌ست به‌ لامه‌ركه‌زییه‌ت و به‌ڕێوه‌بردن و شتی دیكه‌ له‌ عێراق".
هه‌روه‌ها ئه‌وه‌شی گوت كه‌ دیداره‌كه‌ له‌ رۆژی دووه‌میش چه‌ندین باڵیۆزی وڵاتانی دراوسێ و ئه‌ورووپا تیایدا به‌شدارن بۆ ئه‌وه‌ی باس له‌ ره‌وشی عێراق و سیاسه‌تی ناوچه‌كه‌ و ئاینده‌ی رۆژهه‌ڵاتی ناوه‌ڕاست بكه‌ن.