قوباد تاڵه‌بانی: "به‌غدا خۆی به‌ حاكم و ئێمه‌ به‌ تاوانبار ده‌زانێت"

هه‌ولێر-AA

تاڵه‌بانی پێی وایه‌ چاكسازییه‌كانی حكوومه‌ت به‌رده‌وامه‌ و ده‌ڵێت خه‌ڵكی كوردستان شایسته‌ی حوكمڕانی دروستترن.

جێگری سه‌رۆكی حكوومه‌تی هه‌رێمی كوردستان قوباد تاڵه‌بانی ئه‌مڕۆ چوارشه‌ممه‌ له‌ هۆتێل رۆتانا له‌ شاری هه‌ولێر له‌ میانی به‌شداریكردنی له‌ كۆنفڕانسێكی وه‌زاره‌تی خوێندنی باڵا و توێژینه‌وه‌ی زانستیی حكوومه‌تی هه‌رێمی كوردستان ره‌خنه‌ی توندی له‌ حكوومه‌تی عێراق گرت، تاڵه‌بانی له‌وباره‌یه‌وه‌ رایگه‌یاند "زۆرجار له‌ شوێنانی تر به‌تایبه‌ت له‌ حكوومه‌تی عێراقه‌وه‌ باسی چاكسازی ده‌كرێت و زۆر جار كه‌ نزیك ده‌كه‌وێنه‌وه‌ له‌ هه‌ڵبژادنه‌كان باسی چاكسازی ده‌كرێت، وه‌ باسی چاكسازیی وه‌كو دروشم ده‌كرێت، چاكسازیی له‌مه‌و و چاكسازیی له‌وه‌، حكوومه‌تی عێراقیش به‌تایبه‌ت له‌م كاته‌ی كه‌ تووشی كێشه‌ی سیاسی بووه‌ له‌گه‌ڵ هه‌رێم یان هه‌رێم تووش بووه‌ له‌گه‌ڵ عێراق، یان هه‌ردووكمان له‌گه‌ڵ یه‌كتردا تووش بووین مه‌سه‌له‌ی چاكسازیی زوو زوو باس ده‌كرێت، وه‌ زوو زوو هه‌رێم وه‌كو حكوومه‌تێكی دواكه‌وتوو، وه‌كو حكوومه‌تێكی گه‌نده‌ڵ، وه‌كو حكوومه‌تێكی ناشه‌فاف له‌لایه‌ن هاوكارانمان له‌ حكوومه‌تی عێراقه‌وه‌ تۆمه‌تبار ده‌كرێت، به‌ڵام هه‌م ئێوه‌ له‌ وه‌زاره‌تی خوێندنی باڵا و توێژینه‌وه‌ی زانستی به‌كردرا و به‌ پراكتێك نه‌وه‌ك به‌ تیۆری و دروشم هه‌نگاوی گرنگتان ناوه‌ به‌ره‌و چاكسازی ، هه‌م وه‌زاره‌تی تریش ئه‌نجامیداوه‌ به‌ره‌و چاكسازیی راسته‌قینه‌ و چاكسازیی ریشه‌یی و چاكسازیی كارگێڕی و دارایی".

گوتیشی "له‌ وه‌زاره‌تی دارایی و ئابوورییه‌وه‌ بیگره‌ كه‌ پێداچوونه‌وه‌یه‌كی سه‌رتاسه‌ری كردووه‌ به‌ سیسته‌می ئیداره‌ی دارایی به‌ زیاتر سوود وه‌رگرتن له‌ ته‌كنه‌لۆژیا له‌ وه‌زاره‌تی دارایی، به‌ ئه‌لیكترۆنیكردنی ده‌روازه‌ سنوورییه‌كانمان، به‌ ئه‌لیكترۆنیكردنی بۆ تۆماركردنی هاتوچۆی بازرگانی و به‌ ئه‌لیكترۆنی سیسته‌می گومركی به‌شێوه‌یه‌ك پێشتر هه‌ر شتومه‌كێك ره‌نگبێت دوو سێ سه‌عاتی پێویستبایه‌ بۆ ئه‌وه‌ی به‌ده‌روازه‌كانماندا تێپه‌ڕێت، به‌ڵام له‌به‌ر ئه‌م سیسته‌مه‌ی وه‌زاره‌تی دارایی دایناوه‌ ئێستا به‌ 15 تا 20 خوله‌كت پێویسته‌ بۆ ئه‌وه‌ی شتێك له‌ده‌ره‌وه‌ بهێنێته‌ كوردستانه‌وه‌، هه‌روه‌ها ئه‌و زانیارییه‌ش راسته‌وخۆ له‌ وه‌زاره‌یت دارایی ده‌بینرێت، پێداچوونه‌وه‌مان به‌ سیسته‌می باج، پێداچوونه‌مان كردووه‌ به‌ سیسته‌می ئیداره‌ی دارایی له‌ وه‌زاره‌تی دارایی كردووه‌، وه‌زاره‌تی دارایی ئێستا مانگانه‌ و وه‌رزییانه‌ راپۆرتی دارایی خۆی پێشكه‌ش بكات".

جێگری سه‌رۆكی حكوومه‌تی هه‌رێمی كوردستان ئه‌مڕۆ به‌شداریی له‌ كۆنفڕانسی به‌ ئه‌لیكترۆنیكردنی وه‌زاره‌تی خوێندنی باڵا و توێژینه‌وه‌ی زانستیی حكوومه‌تی هه‌رێمی كرد له‌ شاری هه‌ولێر و له‌درێژه‌ی وتاره‌كه‌یدا گوتی "له‌ سیسته‌می بایۆمه‌تری، یه‌كێك له‌ دیارده‌ نه‌شیاوه‌كانی سیسته‌می كه‌رتی وه‌زیفی له‌ عێراق به‌گشتی و له‌هه‌رێمی كوردستانیش دیارده‌ی بن دیوار و دوو مووچه‌ و سێ مووچه‌ی نایاسایی بوو، به‌ڵام ئێمه‌ ته‌نها به‌ قسه‌ باسی ئه‌م دیارده‌یه‌مان نه‌كرد، به‌ڵكو به‌ كردار ده‌ستمان بۆ ئه‌و دۆسییه‌ برد و به‌ كرده‌یی هه‌نگاومان ناوه‌ بۆ چاككردنی كه‌رتی وه‌زیفه‌ی گشتی له‌ كوردستاندا، وه‌ هه‌نگاوی یه‌كه‌م بریتی بوو له‌ تۆماركردنی بایۆمه‌تری كه‌ ئه‌مه‌ ئامانجه‌كه‌ نییه‌ و نه‌بووه‌، به‌ڵكو هه‌نگاوی یه‌كه‌مه‌ بۆ رێكخستنی كه‌رتی وه‌زیفه‌ی گشتی، له‌م پڕۆسه‌یه‌دا توانیومانه‌ ته‌واوی مووچه‌خۆرانی هه‌رێمی كوردستان له‌ پڕۆسه‌یه‌كی شه‌فاف تۆماربكه‌ین، له‌م پڕۆسه‌یه‌دا توانیومانه‌ زیاتر له‌ په‌نجا هه‌زار بن دیواری فعلی نه‌هێڵین كه‌ مووچه‌خۆری وه‌همی بوون، به‌م پڕۆسه‌یه‌ خه‌ریكین ئه‌و بن دیوارانه‌ش بدۆزینه‌وه‌ كه‌ ره‌نگه‌ فه‌رمانی ته‌عینییان هه‌بێت و ده‌وامیش ناكه‌ن، من ده‌مه‌وێت بزانم حكوومه‌تی عێراق چی كردووه‌ بۆ نه‌هێشتنی بن دیواره‌كانی خۆی".

هه‌روه‌ها درێژه‌ی به‌ قسه‌كانی دا و گوتی" من ده‌مه‌وێت بزانم حكوومه‌تی عێراق چی كردووه‌ بۆ نه‌هێشتنی دوو مووچه‌ و سێ مووچه‌ی نایاسایی خۆی، له‌كاتێكدا هه‌فته‌ دوای هه‌فته‌ تیمی وردبینی خۆی بۆ وه‌زاره‌ت و پارێزگاكانمان ده‌نێرن وه‌كو ئه‌وه‌ی ئێمه‌ تاوانباربیین و ئێمه‌ شتێكی هه‌ڵه‌مان كردبێت و ئه‌وان وه‌كو حاكم دێنه‌ كوردستانه‌كه‌ی خۆمان و وردبینی ده‌كه‌ن بۆ ئه‌وه‌ی خێرێكمان پێ بكه‌ن و مه‌عاشێكمان بده‌نێ، هه‌فته‌یه‌ك، دوو هه‌فته‌، سێ هه‌فته‌، مانگێك، دوو مانگ چاوه‌ڕێمان كرد، به‌ڕێز سه‌رۆك وه‌زیرانی عێراق هاته‌ سه‌ر ته‌له‌فزیۆن و به‌هه‌موو كۆمه‌ڵانی خه‌ڵكی كوردستانی گوت من مه‌عاشی مووچه‌خۆری كوردستان ده‌ده‌م و خه‌ڵكی كوردستان خۆشحاڵ بووم به‌و په‌یامه‌ و ئێمه‌ش هاوكاربووین بۆ ئه‌وه‌ی به‌ڕێزی و حكوومه‌ته‌كه‌ی هاوكاربن بۆ دابه‌شكردنی مووچه‌، ده‌رگای وه‌زاره‌ته‌كانمان بۆ كردنه‌وه‌، لیستی تۆماری بایۆمه‌ترییمان پێشكه‌كرد، رێگه‌مان دا تیمی پشكنینی خۆیان بێن و وه‌زاره‌ت به‌ وه‌زاره‌ت بگه‌ڕێن و ئێستاش له‌ پارێزگای سلێمانیین، مانگی رابردوو له‌ هه‌ولێر بوون، ره‌نگه‌ مانگی داهاتوو بچنه‌ دهۆك، نازانیین به‌ڵام مووچه‌كه‌ هه‌ر نه‌هات، ئێمه‌ داواكاریین چیتر یاری به‌ نه‌فسییه‌تی میلله‌ته‌كه‌مان نه‌كرێت، پابه‌ند بن به‌ به‌ڵێنه‌كانی خۆیان و مووچه‌ی مووچه‌خۆرانی خۆیان بده‌ن، هیچ نه‌بێت ئه‌و وه‌زاره‌تانه‌ی خۆیان وتیان ده‌یده‌ن كه‌ وه‌زاره‌تی په‌روه‌رده‌ و ته‌ندروستیین".

قوباد تاڵه‌بانی له‌ میانی ئه‌و وتاره‌یدا بۆ ئاماده‌بووان كه‌ دوو وه‌زیری حكوومه‌ت و ژماره‌یه‌ك له‌ مامۆستایانی زانكۆ و په‌یمانگه‌كان و فه‌رمانبه‌رانی حكوومه‌تیش بوون باسی له‌ فڕۆكه‌خانه‌كانی هه‌رێم و داخستنییان كرد و ره‌خنه‌ی توندی له‌ حكوومه‌تی عه‌بادی گرت و گوتی "له‌ بواره‌كانی تریشدا ئێمه‌ ئاماده‌بوونی خۆمانمان ده‌ربڕیوه‌ چییان ویستووه‌ سه‌باره‌ت به‌ فڕۆكه‌خانه‌كان ئێمه‌ لارییمان نه‌بووه‌، كارمه‌ندی حكوومه‌تی فیدڕاڵی ده‌نێرن به‌خێربێن، پشكنین ده‌نێرن به‌خێربێن، سه‌رپه‌رشتیار ده‌نێرن به‌خێربێن، به‌ڵام ده‌بینین هه‌فته‌ له‌دوای هه‌فته‌، مانگ له‌ دوای مانگ ئه‌و ئابڵوقه‌یه‌ له‌سه‌ر هاتوچۆ له‌هه‌رێمی كوردستانه‌وه‌ هه‌ر ماوه‌ته‌وه‌ كه‌ بووه‌ته‌ جێی داخ و نیگه‌رانیی خه‌ڵكی كوردستان".

هه‌رچی په‌یوه‌سته‌ به‌ كه‌رتی نه‌وتیشه‌وه‌ قوباد تاڵه‌بانی گوتی، پێشنیازییان خستووه‌ته‌ به‌رده‌ستی به‌غدا بۆ ئه‌وه‌ی نه‌وتی كه‌ركووك له‌رێگه‌ی بۆریی هه‌رێمی كوردستانه‌وه‌ هه‌نارده‌ بكات، له‌وباره‌یه‌وه‌ رایگه‌یاند "سه‌باره‌ت به‌ نه‌وت، ئه‌مڕۆ نه‌وتێكی زۆر له‌ كه‌ركوك راگیراوه‌ و چه‌قیوه‌ و بوار نییه‌ هه‌نارده‌ بكرێت، بوار نییه‌ بفرۆشرێت، ئێمه‌ به‌ به‌ڕێز عه‌بادیمان گوت فه‌رموون ئێمه‌ بۆریی نه‌وتمان هه‌یه‌ ئێوه‌ نه‌وتی كه‌ركووك هه‌نارده‌بكه‌ن و ئێوه‌ بیفرۆشن و ئێوه‌ داهاتی نه‌وتی كه‌ركووك وه‌ربگرنه‌وه‌ بۆ ئه‌وه‌ی ته‌كمیله‌ی داهاته‌كه‌ی خۆیانی پێ بكه‌ن، داوای كاری ئێمه‌ ئه‌وه‌بوو كه‌ بێن و به‌رهه‌مه‌ نه‌وتییه‌كان كه‌ موسته‌حه‌قی هه‌رێمی كوردستان و پارێزگاكانی هه‌رێمه‌ بۆیان دابین بكه‌ن وه‌كو گازۆیل و نه‌وتی سپی، به‌ڵام هێشتا نه‌یانكردووه‌، بیانوو له‌دوای بیانوو و هه‌ر دواخستنی ئه‌م پڕۆسه‌یه‌یه‌، وه‌ خه‌ریكه‌ خه‌ڵكی هه‌رێمی كوردستان و ئێمه‌ش له‌ حكوومه‌ت هیلاك ده‌بین به‌م بارودۆخه‌وه‌، دڵنیاشین چه‌ند نزیكتربكه‌وینه‌وه‌ له‌ هه‌ڵبژاردنه‌كان زیاتر ئه‌م یارییه‌ ده‌كرێت، بۆیه‌ هیوادارم چیتر حكوومه‌تی عێراق كارتی چاكسازیی و ناشه‌فافبوونی هه‌رێم نه‌كاته‌ بیانوو بۆ پێنه‌دانی مووچه‌ی مووچه‌خۆرانی هه‌رێمی كوردستان".

له‌باسی په‌یوه‌ست به‌ چاكسازییه‌كانی حكوومه‌تی هه‌رێم قوباد تاڵه‌بانی ئاماژه‌ی بۆ ئه‌وه‌كرد كه‌ كابینه‌كه‌یان چه‌ندین رێوشوێنی گرتووه‌ته‌ به‌ر بۆ ئه‌نجامدانی چاكسازیی له‌ هه‌موو بواره‌كاندا، له‌و لایه‌نه‌وه‌ گوتی" باسی چاكسازی ده‌كه‌ین، باسی شه‌فافییه‌ت ده‌كه‌ین، له‌ هه‌رێم ئێمه‌ هه‌ستاین نه‌وه‌ك له‌سه‌ر داوای هیچ لایه‌نێكی دیكه‌ و نه‌وه‌ك به‌ فه‌رزی هیچ لایه‌نێكی دیكه‌، ئێمه‌ چووین گه‌وره‌ترین كۆمپانیای وردبینی نه‌وت و غازمان هێنایه‌ كوردستان و وردبینییه‌كی ته‌واوییان له‌ پڕۆسه‌ی نه‌وت و غاز له‌هه‌رێمی كوردستان كرد و ئه‌و پڕۆسه‌یه‌ش به‌رده‌وام بووه‌ و ده‌رئه‌نجامی هه‌بووه‌، یه‌كه‌م راپۆرت له‌لایه‌ن كۆمپانیاكه‌وه‌ راگه‌یه‌نراوه‌، وه‌ خه‌ریكه‌ كۆمه‌ڵگه‌ی نێوده‌وڵه‌تی ده‌گاته‌ ئه‌و قه‌ناعه‌ته‌ی كه‌ هه‌رێمی كوردستان جیددیه‌ له‌ پڕۆسه‌ی شه‌فافییه‌ت، ئه‌گه‌ر پێشتریش كه‌موكوڕیی هه‌بووبێت له‌ رابردوودا له‌ مه‌سه‌له‌ی شه‌فافییه‌ت، ئێستا جیددیتره‌ له‌ راگه‌یاندنی داتا و ئاماره‌كان، جیددیتره‌ له‌ پرسی شه‌فافییه‌ت، جیددی تره‌ له‌ چاكسازییه‌كان".

جێگری سه‌رۆكی حكوومه‌تی هه‌رێمی كوردستان هه‌روه‌ها گوتیشی"من باسی بایۆمه‌تری و وه‌زاره‌تی داراییم كرد، به‌ڵام ئێستا له‌ وه‌زاره‌تی كاره‌باش به‌ هاوكاری بانكی نێوده‌وڵه‌تی چاكسازیی به‌ڕێوه‌یه‌، ئه‌وان تیمییان لێره‌ن بۆ پێداچوونه‌وه‌ به‌ سیسته‌می كاره‌با، له‌ مه‌سه‌له‌ی تۆڕی پاراستنی كۆمه‌ڵایه‌تی یاسا ئاماده‌كراوه‌ و خه‌ریكه‌ یاسا په‌سه‌ند ده‌كرێت، چاكسازیی بكه‌ین له‌ سیسته‌می خانه‌نشی، راسته‌ ره‌نگه‌ له‌هه‌ندێك به‌رژه‌وه‌ندیی بده‌ین، ره‌نگه‌ هه‌ندێك كه‌س بێن و ره‌خنه‌ له‌و چاكسازییانه‌ بگرن، به‌ڵام چاكسازی بێ ئازار نابێت، بۆیه‌ ئێمه‌ ده‌مانه‌وێت بۆ خه‌ڵكی خۆمان پێش هه‌موو شتێك، بۆ كارمه‌ندانی حكوومه‌ته‌كه‌ی خۆمان روونی بكه‌ینه‌وه‌ و دڵنیایان بكه‌ینه‌وه‌ كه‌ چاكسازی بۆ ئێمه‌ ته‌نها دروشم نییه‌، چاكسازی بۆ ئێمه‌ ته‌نها تیۆر نییه‌، ئێمه‌ به‌ كرده‌یی ده‌یكه‌ین، ئێوه‌ به‌ كرده‌یی ئه‌نجامتان داوه‌، ئه‌مڕۆ ئه‌مه‌ی كردووتانه‌ هه‌نگاوێكه‌ له‌ هه‌نگاوه‌كانی چاكسازیی له‌ كه‌رتی خوێندنی باڵا، ده‌ستخۆشیتان لێ ده‌كه‌م، له‌ وه‌زاره‌تی ناوخۆ كه‌ به‌پێی ستانداردی ئایسۆش به‌ ئه‌لیكترۆنی وه‌زاره‌ته‌كه‌یان ئه‌نجامداوه‌، پڕۆسه‌ی تۆماركردنی كۆمپانیاكان به‌ ئه‌لیكترۆنی ده‌كرێت، من وای ده‌بینیم ئێمه‌ ئه‌گه‌ر له‌سه‌ر ئه‌م نه‌فه‌سه‌دا بمێنینه‌وه‌ و به‌م رۆحییه‌ته‌ بمێنینه‌وه‌ و ئه‌م چاكسازییانه‌مان به‌رده‌وام بێت حوكمڕانییه‌كی دروستترمان ده‌بێت، له‌به‌ر ئه‌وه‌ی خه‌ڵكی كوردستان شایسته‌ی حوكمڕانییه‌كی دروست ترن".