لەتیف شێخ عومەر: "سیستەمی كوردستان بەشەڕ ناگۆڕدرێت"

لە گوتەیەكدا كە بەبۆنەی یادی 25 ساڵەی راپەڕینی خەڵكی كوردستانەوە دژی ڕژێمی پێشووی عێراق و لە دیبەتێكی تایبەت بەو بۆنەیەوە پێشكەشی كرد، ئەندامێكی سەركردایەتی یەكێتیی نیشتمانیی كوردستان و بەرپرسی مەڵبەندی سلێمانی ئەو حزبە لەتیف شێخ عومەر رایگەیاند: "گۆڕینی سیستمی ئێستای كوردستان بەجۆرێک رەگ و ریشەی داكوتاوە ریفۆرمكردن تێیدا ئاسان نییە ، شۆڕشیش دەكەی شەڕی ناوخۆی لێ دەكەوێتەوە كە پێشتر تاقیمان كردووەتەوە و ماڵوێرانی و كاولكاری گەورەی لێ كەوتەوە".

بەرپرسەكەی یەكێتی گوتی:" پێش سێ‌ مانگ كاتێك پەرلەمان راگیرا و وەزیرەكانی گۆڕان نێردرانەوە شەڕ لە بەردەرگای ماڵەكەمان بوو، وەك یەكێتی قاچمان دا بە زەویدا و گوتمان شەڕ ناكەین لەبەر ئەوەی مەینەتییەكەیمان بینیوە و دەمانزانی چی بەدوادا دێت، بڕیاری ئێمە ئەوەبوو كە شەڕ نەكەین و داوای لێبوردنمان كرد لە گۆڕان و گوتمان هەرچییەك بێت شەڕ ناكەین، لەبەر ئەوەی دەترساین دوای مانگێك برادەرانی گۆڕان بێن ئاشتەوایی ئێمە و پارتی دیموكراتی كوردستان بكەن و داوای ئاشتەوایی بكەن".

لەتیف شێخ عومەر بە ئامادەبووانی دیبەیتەكەی گوت: "جگە لەشەڕ هەرچی دەكەن بۆ گۆڕینی ئەم سیستەمە بیكەن بەڵام ئەوە بەشەڕ ناكرێت و بەشەڕ ناگۆڕدرێت كە ئەگەر بەشەڕ بگۆڕدرایە لە ساڵی 1996 ئێمە دەمان گۆڕی بەڵام بۆمان نەگۆڕدرا".

ئەو لێدوانەی بەرپرسەكەی یەكێتیی نیشتمانیی كوردستان لە ساڵیادی راپەرینی دانیشتووانی شاری سلێمانیدایە كە پێش 25 ساڵ و لە رۆژی حەوتی ئاداری ساڵی 1991 دژی رژێمی ئەو كاتەی عێراق راپەڕینیان كرد و شارەكەیان رزگار كرد.