شاندی حکوومەتی ھەرێمی کوردستان لەگەڵ نوری مالیکی کۆبوویەوە

ھەولێر ــ AA

شاندی باڵای دانوستانکاری حکوومەتی ھەرێمی کوردستان بە سەرۆکایەتی جێگری سەرۆکوەزیرانی ھەرێم، قوباد تاڵەبانی لە چوارچێوەی سەردانەکەی بۆ بەغدا لەگەڵ سەرۆکی ھاوپەیمانیی دەوڵەتی یاسا، نوری مالیکی کۆبوویەوە.

ماڵپەڕی حکوومەتی هەرێمی کوردستان بڵاویکردەوە کە لە کۆبوونەوەکەدا، دوا پێشھاتەکانی گفتوگۆی نێوان ھەولێر و بەغدا لەبارەی بوودجەی گشتیی ٢٠٢١ تاوتوێ کراوە.

باس لەوەشکراوە کە لە میانی کۆبوونەوەکەدا، نوری مالیکی پشتیوانی خۆی دەبڕیوە بۆ ھەوڵەکانی گەیشتن بەڕێککەوتن.

ئاماژەی بەوەیشداوە کە هەردوولا هاوڕابوون لەسەر پێویستی چارەسەركردنی پرسی بوودجە لە پێناو بەدیهێنانی بەرژەوەندی هەموو لایەن و پێكهاتەكانی عێراق، دوای ئەوەیش خۆتەرخانكردن بۆ بەرەنگاربوونەوەی كێشە بنەڕەتییەكانی دیکەی وڵات بەتایبەتی مەترسی تیرۆر، سەرهەڵدانەوەی داعش و دۆسیە كەڵەكەبووەكانی ساڵانی رابردوو.